独家丨陈国坤拍《反黑2》狠心粉碎囝囝演员梦赞肥仔聪儿子好打得可拍《少年足球》

2024-01-31 07:00

2017年，陈国坤（小龙）和导演宋本中制作网剧《反黑》口碑极佳，更成为首部登录Netflix的粤语剧。相隔6年，终于开拍《反黑2》，小龙及宋导表示疫情影响外，因剧本包含1830年到1997年的香港历史，资料搜集极花时间，提到已故的吴孟达更相当怀念。而曾客串《反黑》的小龙囝囝陈真，《反黑2》就冇佢份，原因系身兼主演及监制的老窦觉得佢冇天份，更大爆肥仔聪的囝囝又Cute又好打，可以开套《少年足球》畀佢拍。采访：杜杜摄影：Stanley

小龙和宋本中预计60集的《反黑2》要拍足1年，开心替香港电影圈制造很多就业机会。

小龙认为剧本是一剧之本，坚持修改好才正式开拍。

宋本中坦承将历史结合剧本花了最多时间。

讲到制作费达2亿元，更传有意邀请奥斯卡影帝罗拔迪尼路及安东尼鹤健士演出，宋导就澄清，「唔系我哋官方讲，制作费亦有限，用晒成部戏嘅预算都唔够请，我当然想啦！我都打过畀佢，不过话唔得闲，哈哈！一个系佐敦版，一个系旺角版，都唔得闲。」不过小龙承认有意邀请外国演员演出，「讲核心嘅黑势力嚟自外国，好想搵啲有份量嘅外国演员，大家都认识嘅。」

《反黑2》中的小龙由警察变社团大佬，跟好兄弟陈小春对立。

《反黑2》小龙将跟陈小春及新加盟的谢天华有大量冲突戏。

李璨琛冇份拍《反黑2》

小龙及宋导都希望原班人马演出《反黑2》，但上辑有份投资及演出的李璨琛，今次不会参与，宋导解释是「商业决定。」而他们觉得最遗憾是已离世的前辈黄树棠和吴孟达，提到达哥更特别感触，宋导表示《反黑》时，达哥已关心筹备剧本的进度，小龙又大赞达哥提点对他们帮助极大，「佢一句话就打通我哋任督二脉。」小龙又想到拍第1辑时对方的专业态度，「我哋定装、试衫嗰日，佢已经搞好晒同佢角色有关连嘅嘢，同导演亦交代晒。」宋导再补充，「嗰日仲要系佢生日，我好感动。」宋导最难忘写《反黑2》剧本时，达哥已病重入院，「有段时间我都好混乱，点样将历史同剧结合呢？！到吴孟达先生出事，我哋去见佢最后一面，佢仲畀到能量我，觉得一定要写好个剧本，嗰吓火就上嚟，我真系好挂住佢！」

达哥在《反黑》饰演「猪油」，与柯有伦最多对手戏。

两人对达哥专业态度赞不绝口，遗憾《反黑2》缺了他。

小龙感谢达哥的安抚

小龙相信观众都会挂住达哥，所以剧集会有致敬部份，但不会太刻意。小龙透露对达哥感情特别深，因入行拍《少林足球》第1个镜头就得到前辈照顾，令他永世难忘，「第1次同佢拍就拍咗37个take，就系我讲『锋哥，边个唔识锋哥呀』嗰个，我第1个镜头拍咗9千尺菲林，周生（星爷）当时已经好嬲，达哥慢慢安抚，仲同我讲咗好多嘢，有句好深刻，佢话『有几多演员第1次拍戏就可以对住周星驰、吴孟达，畀咁多菲林去训练你，呢啲真系天赐嘅机会』嗰句令我充满力量。」小龙话当时根本唔识得怯，因连自己做紧乜都未知，「第1次拍戏，朝早6点就畀张写满字嘅纸你背，5分钟后就拍，记得已经好劲。达哥拍拍我膊头，就系畀到一个定海神针。」

小龙跟达哥在《少林足球》中初次合作，感激对方照顾。

小龙冇刻意要囝囝做任何职业，「佢话自己想做科学家，所以都系读好书先啦！」

肥仔聪囝囝好有潜质

《反黑2》大部分在香港拍摄，小龙最开心，因为收工可以返屋企而非酒店。提到7岁囝囝陈真可以经常去探班，他就好无奈：「佢大个唔会挂住我，挂住去玩啦！我系佢伴读书僮嚟。」《反黑》时小龙太太黄伊汶和陈真都有份演出，但后者不会再参与《反黑2》。宋导都赞陈真靓仔，好有明星风范，但小龙认为囝囝非演戏材料，「之前喺青岛拍戏，佢放暑假嚟探班，佢问『可唔可以试吓做演员』，嗰套戏我有个女同佢差唔多大，我话『你睇我哋拍先』，有场戏讲我个女喺我面前喊，我话『做演员就咁，凌晨两点陈真你喊畀我睇』佢话喊唔到，我话『你冇得做演员嘞，哈哈，演员要随时控制你情绪』。」

黄伊汶《反黑》时亦有演出，饰演小龙女友「Jennie」。

小龙跟黄伊汶结婚10年，育有7岁囝囝陈真。

小龙话陈真对拍戏好好奇，特别锺意睇枪战片。

小龙一直有教陈真打功夫，但后者不及同样跟他习武的林子聪儿子林奕滔有表演天份，「佢同肥仔聪个仔系两师兄弟，肥仔聪个仔劲佢好多，武痴嚟，5岁打双节棍打到好似我咁，绝对有潜质，同埋佢真心锺意，成日上台表演，真系有表演欲，同埋佢系cute嘅肥仔，迷你洪金宝咁，又可以打侧手翻。」宋导即度到，「整个《少年足球》。」小龙再笑言：「硬憾《少林女足》，哈哈！讲啫做唔到。」小龙又谓只要星爷开声，随时准备拍《少林女足》，「佢叫到唔收钱都做，佢系神级人物，好多年冇见，但有联络，其实我哋好怕见到佢，好似见训导主任咁，好有压力，自己状况差啲都唔好见到佢。」