独家丨马贯东夺「男飞跃」自爆仍靠阿妈接济入行18年历尽辛酸曾被掟剧本

2024-01-25 07:00

曾被人掟剧本侮辱，37岁的马贯东（Mark）终于吐气扬眉，开斋首夺TVB台庆颁奖礼「男飞跃」奖。Mark 捱足18年，10年前曾被误会是电视台道具工，自爆今时今日母亲仍然久不久塞钱畀佢，即仍要靠屋企财政支援。得奖要特别多谢「救命恩人」杨茜尧，也希望令长期担忧他的妈妈增加安全感。采访：方骞平摄影：朱伟彦

37岁的马贯东自30岁后，才突然醒觉人生步伐堕后。

Mark希望奖项可以令妈妈有安全感。

在单亲家庭成长嘅Mark，是朋友眼中的「裙脚仔」。

Mark终极目标系「最佳男主角」。

马贯东认为做人目标要高，但抱住平常心。

马贯东嘅剧作《新闻女王》、《你不是她》、《旁观者》于颁奖礼前夕陆续推出，令他占尽优势，撼赢眼中头号竞敌阮浩棕、孔德贤成为最资深「男飞跃」得主。他自言要一步一步打好根基，希望3年内成为「男配」；终极目标系「最佳男主角」：「钱家乐话过『望住4座位座驾永远揸唔到法拉利』，所以做人目标要高，但抱住平常心。」

Mark台上致词时坦言「无畀家用」。

Mark早已睇好林子善系男配得主。

在《新闻女王》中有发挥。

《旁观者》中饰演深水埗虾虾霸霸嘅小陀地。

凭单眼皮杀出血路

Mark入行18年，直至8年前的《铁马战车》才有机会学习基本功；至于拍《爱·回家之八时入席》从毛舜筠及黎耀祥身上获益良多；而《那些我爱过的人》演患有亚氏保加症医生，第一次感受到演员嘅使命感，原来有责任带出正确资讯畀观众，亚氏保加症病者唔系低智商；去到《破毒强人》的「杜飞」系另一个层面，从未接触过有故事嘅大反派：「原来监制Marco睇中我单眼皮，同埋唔系好出声呢个特质，最啱做意想不到嘅杀手，哈！第一次觉得原来单眼皮对演出系有帮助。」

《破毒强人》嘅冷面杀手「杜飞」令Mark事业起飞。

2016年拍《爱·回家之八时入席》跟周嘉洛Friend咗，亦从黎耀祥身上学咗好多。

8年前拍摄《铁马战车》终有学习机会。

《那些我爱过的人》演患有亚氏保加症医生。

《爱上我的衰神》受注目。

《点解阿sir系阿sir》做闲角。

跟谢芷伦在《爱·回家之开心速递》系受欢迎一对。

杨茜尧借剧本解围

Mark唔认为自己的事业是迟来的春天，反而觉得时间啱啱好，机会太早反而未必懂得珍惜，还爆出初入行时被杨茜尧「营救」经历：「年轻时都系行行企企(做茄喱啡)，嫌个角色冇乜发挥，有次冇睇剧本返工，排位时先知原来系有句对白，要交代啲重要嘢，当时杀我一个措手不及，好彩身边嘅杨怡(杨茜尧)队份剧本过嚟帮我解围，事后都知衰马上道歉，自此变得专业，唔敢唔睇剧本。不过，阿怡嘅窝心举动好深刻，最近再合作拍《黑色月光》旧事重提，但佢都冇乜印象。」

最近跟「救命恩人」杨茜尧拍《黑色月光》。

第21届艺训班学员，除他(第2行左1)外，还有张頴康(后左4)、陈志健(前左1)及阮儿(后左3)。

被掟剧本若无其事

提到辛酸史，曾被演员掟剧本的Mark冇放上心：「事后谂返自己都冇做错，当时未开机，拎住剧本好正常，只系佢唔锺意…(演员系咪燥底？)唔评论，事发时场内个个都呆晒，我同其他人当作若无其事，即使𠵱家见到面大家扮唔记得，仲有偈倾。」他唔嬲还自我安慰：「算啦…只系反映佢嘅人格，唔会影响到我，可能佢嗰期唔开心呢！呢个系入行以嚟最愕然嘅经历，一个人喺公司18年，冇可能系一帆风顺嘅。」

同视帝陈豪互相恭贺。

Mark认为入行头10年「什么也不是」的阶段最艰辛，较半红不黑嘅奀星还要奀：「记得有次睇医生，医院有病人搲水吹问我做乜职业？我答做电视台，对方追问系咪做道具工？我唔想多讲就答系。虽然𠵱家多人认识咗，行街会有观众眼望望叫我『博士』、『杜飞』，但妈妈Keep住好担心我将来，成日问『点呀？够唔够钱使？会唔会好辛苦？』佢每次返港，甚至会收埋啲钱喺衣柜暗角stand by，久不久提示我唔够就去『安全仓』拎钱。」Mark希望奖项可以令妈妈有安全感：「最开心见到妈妈开心，佢睇到网民留言话得奖实至名归，会比我更开心。」在单亲家庭成长嘅Mark，是朋友眼中的「裙脚仔」，他冇否认还笑说：「咁都ok嘅，至少冇行差踏错。」