星8卦｜「绝世」心急嫁「老公」被利用翻身后悔惟有扮低调

2023-12-22 11:30

自从同「老公」结婚之后，「绝世」过住比较隐蔽嘅生活，因为呢铺计错数非常无面。「绝世」自问同其他女人最唔同嘅地方，就系想勾引边个都手到拿来，唯一一次同「正气」拍戏，点用媚功都搞对方唔掂，后嚟知佢娶咗「南洋」，挫败感就历年都喺心底，所以成日喺人前人后都数「正气」怪脾气。

但有时真系一世精明，遇到「老公」系无谂过有结果，毕竟对方太有钱，两个人又差唔多年纪，男人通常系搵妹妹仔开心嘛！最抵死系「老公」一出手「绝世」直头谂都唔谂就去马，咁啱当时「老公」生意有啲问题，安排自己同「绝世」约会俾相熟记者影到，然后扮无知咁公开，果然因为「绝世」嘅名气令股价升咗好多，暂时嘅难关亦过到。

「老公」沟女无数，但从来唔知女人可以咁样帮自己，于是好快就向「绝世」求婚，不过又强调自己向来低调，惊公开之后两个人都成日俾人追住采访，所以带佢去个冇乜法律效力嘅地方注册，「绝世」无为意太多，其实系「老公」谂住将来唔掂唔使分太多身家。结果「老公」并无因为结咗婚收敛，依然带住啲廿零岁嘅𡃁妹周围去，好彩「绝世」有乜大场面未见过，初时直头当睇唔到，总之自己系正印，霸住个位话之你，但因为「老公」玩得太公开，怕俾人笑，所以都好少出嚟，费事引人话柄。