独家丨李幸倪 林奕匡 廖子妤揭童年过瘾秘史 为Sell配音动画笑谈温馨手足情

李幸倪（Gin）和林奕匡（Phil）第3度为动画《魔法精灵》配音，今集《魔法精灵：夹band天团》还有声演初哥的廖子妤（Fish）加入。电影以兄弟姊妹情做主题，戏如人生，Gin便获家姐来港陪做访问； 而Phil就好记得可以讲一世的哥哥暖心举动；童年Fish就爱憞起家姐款管教两个妹，三人讲起温馨家事就停唔到。采访：杜杜 摄影：Stanley发型:@angus1030@artifylab(Gin)、kenki lau(Phil)、Cedric Tsang(Fish) 化妆:Chi Chi Li(Gin)、carmenC(Phil)、Angel Mok(Fish) 场地:红磡黄埔天地

Gin、Phil和Fish分开录音，所以感觉唔似合作，他们希望将来有机会正式合作。

Gin和Phil第3次为《魔法精灵》系列配音，热身一阵就上手。

Gin第3度声演「宝宝公主」，最开心跟角色一齐成长，「唔知仲有冇机会帮佢配音，已觉得好圆满，角色每集都有唔同，今集佢大个女同阿班拍拖，下集可能讲佢结婚生仔。」而第3次为「阿班」配音的Phill就要热身，「记得第1集要录几日，因为唔合格仲要重新录过头嗰段，第2集已经唔使补录，到今次因为隔咗几年，角色情绪又比较高涨，需要用半个钟热身，我平时比较温柔嘛！哈哈！」

Gin声演「宝宝公主」。

「宝宝公主」

Phil声演「阿班」。

Phil声演「阿班」。

Fish声演「花花」。

「花花」

 Gin有家姐陪做访问

首加入《魔法》的Fish亦好紧张，因她只帮过自己演出配音，第1次声演动画人物，加上担心带有马来西亚口音，「知道原来我系做Gin家姐，咁就啱嘞！哈哈！我最锺意成个配音过程，最后配啲情绪嘅声，可以随感觉咁嗌，好好玩呀！」声演新角色「花花」的Fish，锺意这个精灵家族好有爱，「佢哋生活好简单，就系剪剪贴贴，锺意啲闪令令嘅嘢，仲有唱歌、跳舞，又冇纷争，好锺意呢个世界观，最重要世界和平。」

「宝宝」和「阿班」大个晒，仲学人拍拖！

「宝宝」一直恨有家姐，终于有「花花」出现一齐玩。

电影以手足情为主，3人好有共鸣。Gin戏里戏外都有个家姐，角色令她想起很多童年回忆，「我家姐都系cool cool哋，我哋细个都系锺意一齐剪剪贴贴。」Gin两姊妹年纪相差大，所以关系亦分几个阶段，「细个佢放学返嚟第一时间搵我抱抱，到我上小学佢读中学就有啲尴尬，佢反叛期有自己圈子，到再大啲10几20岁，又close返，一齐买衫、化妆。」虽然近10年她来港发展，但无损姊妹情，每日都会传讯息或者FaceTime。其实Gin姐姐近日来港探望她，还陪她做访问，但因怕丑不愿上镜。

Gin感激家人一直支持她追梦，2018年更担任其演唱会嘉宾。

Gin每日都会跟家人视像通话。

感激家人撑来港追梦

Phil亦跟角色一样，同样有哥哥，不单感情好，哥哥亦是他的榜样，「无论读书、做嘢，我超越唔到佢。」行开温文路线的Phil，原来细个相当百厌，经常整烂哥哥嘅玩具，「哥哥成日笑我，无论玩具定鞋，都容易烂过人，哈哈！」年前他终于补偿哥哥，「有个日本嘅玩具喺美国卖断巿，佢见香港有得买，就问我可唔可以帮佢买，之后我唔肯收佢钱，我话『系补偿我咁多年整烂你啲嘢』哈哈！」两兄弟细个可能会有争执，但长大后Phil发觉哥哥好锡佢，「佢由埠仔搬到温哥华读大学，知道我好锺意某个歌手，买CD送畀我做圣诞礼物，嗰时啱啱可以将CD放入电脑、MP3，但佢都冇拆只CD听住先，佢话知道拆CD嗰个动作好喜悦，所以留返畀我，呢个可以记一世。」

Phil跟哥哥唔止感情好，仲好似样。

Phil的父母住在加拿大，但感情不变。

Fish跟角色都是家姐，细个会跟角色一样爱憞起家姐款，「想保护两个妹，扮到好强势，话呢条路唔行得，一定会撞板，就管多咗，譬如佢哋着衫同埋言行，其实自己都做得唔好。」Fish称现在跟两个妹如朋友相处，「唔系一齐住，比较少见，会好珍惜相处时间，同埋佢哋都结咗婚，好似得返我系细路女咁。」

童年Fish（左）最锺意管住妹妹。

上月Fish返家乡，喊住跟大妹送二妹出嫁。

3人都是离乡别井来港追梦，强调家人的支持很重要。Gin说：「如果当初佢哋反对，都未必可以行到落去。」Phil好认同，「哥哥读到博士，跟住去做科学家，一切都好稳定，我先可以任性，如果我系阿哥一定做唔到，所以我好幸运。」Fish亦好同意，「唔系一定要拉晒大队，我屋企就系默默地支持，自己好蠢，𠵱家先意识到最强后盾，无条件嘅爱，无论我做得好唔好，佢哋都会喺度，嗰种感觉令我好安心。」

Gin、Phil和Fish分开录音，所以感觉唔似合作，他们希望将来有机会正式合作。

《星岛头条》新网站有更多精彩内容：http://www.stheadline.com/