独家丨程人富拍Mike导《无制限》：试过一镬够皮啦 同FINALLY演舞台剧贺小薯茄7周年

程人富（程仁富）、阿J（关浩杰）、肥蚊（姚泽汶）和朱Mic（朱柏熹）在小薯茄中演出《FINALLY嚟喇》环节，继而组成男团「FINALLY」兼推出首支单曲《终于出歌》，最近更宣布12月举行舞台剧《FINALLY OK》，更搵来Haters组识「反NALLY」首领阿冰做嘉宾助销飞。人富讲到以Anchor man身份拍《无制限探险队》，他坦认同 Mike导合作过已够皮，但唔排除将来拉埋FINALLY再合作尽情玩。采访：杜杜 发型:Oscar Ngai化妆:Hulda Tsai 服装:Rickyy Wong

FINALLY为舞台剧事前做足准备，除上导演陈小东特别准备的喜剧workshop恶补。

FINALLY为舞台剧事前做足准备，除上导演陈小东特别准备的喜剧workshop恶补。

第一队长人富话旧年6周年骚，由于FINALLY太受欢迎，决定今年7周4子再演舞台剧，「真心讲旧年FINALLY嗰part，被公认最好反应，我同阿J除衫嗰part，都唔够呢part掌声嚟，我哋4个耳仔就系证据，听到好大声掌声，咁唔得嘞！再咁落去我哋就会喧宾夺主抢晒小薯茄风头，索性自己搞一个骚，趁住7周年搞个斋FINALLY，同埋阿冰（吴冰）嘅舞台剧，畀大家睇吓我哋除咗唱歌公认好听外，做戏亦都好睇。」

去年小薯茄6周年，FINALLY声称演出获最多掌声。

人富和阿J去年除衫演出，都不敌FINALLY受欢迎。

阿冰做嘉宾有助票房

小薯茄女成员中，为何只选阿冰做嘉宾呢？人富就好老实话，「为咗票房嘅方向，哈哈！」之后他再认真解释，「你估我唔想拣晒佢哋3个咩？！但系佢哋都忙，丽英（邓丽英）有个人演唱会，童童（蔡晓童）有个剧，佢哋要参与就要𠵱家开始埋位排，但佢哋都唔得闲。」他们都有想过全男班演出，甚至男扮女装，但都觉得唔可行，第二队长阿Ｊ解释：「有个女仔同我哋一齐排戏，系会开心啲嘅。」第三队长肥蚊都认同，「当刚阳味太重，会好火爆。」人富讲出终极原因，「演出好辛苦，但有阿冰喺度我哋愿意，我估啲观众都愿意好多，真心嘅，我哋FINALLY有好多Haters，自称为『反NALLY』呢个组织就系以阿冰、丽英同童童为首，我哋想阿冰嚟，带多啲佢哋啲『反NALLY』嚟反我哋，炒热个气氛罗！」

FINALLY决定搵阿冰做嘉宾，贪其对票房有直接帮助。

FINALLY都想搵埋丽英和童童参与舞台剧，可惜两人要忙其他工作。

肥蚊指个骚内容会贯彻主题「FINALLY OK」，唔会杂乱无章做个剧，还会分多个场景和角色去演出，「源自《FINALLY嚟喇》嘅精神同理念，我哋会去挑战一啲人哋觉得我哋唔会做到嘅嘢，最显而易见就系我哋4个做男团呢件事，所以系 FINALLY OK，最衰就系我哋靓仔，纵使唱歌跳舞未系去到最top，但系我哋都系男团，呢个剧我哋会有唔同场景，但每个都畀到观众『FINALLY OK』呢个感觉。」由于未正式彩排，所以暂时他们都未知扮演角色，阿J话：「可能会几天马行空，好抽象，譬如会扮督屎！」人富笑谓：「好玩唔玩去玩屎，男团都去做屎！哈哈！」

FINALLY首次开9场骚怕体力不支，已开始节食兼做运动。

当正林峯录歌出晒事

比起玩屎，人富最近做Anchor man的ViuTV节目《无制限探险队》，在非洲拍摄时直情系玩埋命，他摇晒头话：「好彩返到嚟，好彩死唔去，可以返嚟开骚，返嚟玩屎！」问到仲想唔想同咁癫的Mike导再合作？人富反应好大话：「Mike导呀！唔敢啦！试过一镬都够皮啦！」系咪觉得懒懒哋嘢？他就否认：「最危险其实佢自己顶晒㗎啦，佢都算唔话得，但系再嚟多镬呢？我知佢作风系锺意新鲜感，佢可能要试吓啲其他嘢，或者同唔同嘅人合作过后，我哋先至再jam埋一齐罗！」他觉得将来带埋FINALLY 兄弟一齐拍都冇问题，「如果Mike导加我哋4个，应该系话无制限团队加我哋4个嘅话，会几好玩，我哋4个又够抵死，佢哋又可以尽情谂啲嘢嚟玩我哋。」至于去边度拍好呢？他就话：「都真系要度吓，我哋4个可以一齐去啲咩地方。」肥蚊竟提议，「潮州罗！哈哈！」

人富在《无制限》与Marco（叶振弘））齐做Anchor man。

人富在《无制限》夹在Mike导前面喂野生鬣狗，幸好有惊无险。

人富赞Mike导唔话得，最危险镜头都亲身上阵，仲搞到中埋枪。

FINALLY 最近推出首支单曲《终于出歌》，正式以歌手资态出道，人富突然变得好谦虚戴晒头盔话：「唱歌对我哋嚟讲系表演嚟，我哋唔会话𠵱家系个专业歌手，惊侮辱咗其他歌手，平心而论，我哋唱功都有排进步。」原来他们有专登搵老师学唱歌，依然未见明显进步，所以人富有感而发，「尽咗力都系咁，本身个底唔够好，短期内唔会变好听好多，所以录歌都系希望好玩为主，希望大家听我哋唱歌，会好似睇紧我哋啲片咁样感觉。」朱Mic话首歌录了两日，第一日好认真，个个当自己林峯咁唱，反而出晒事，「以为自己可以唱到好似《爱在记忆中找你》（林峯名曲）咁好听嗰吓死嘛，一嚟唔好玩，二嚟唔好听。」人富笑指：「得个样似！」朱Mic反对话：「唔系个样，系得个表情似咋！」肥蚊笑指音乐总监早估到他们唱歌水准，「佢好淡定，应该系预视到我哋唔系技巧取胜，用返我哋精神，够好玩就得。」朱Mic直言巿场上，好难搵到他们这种package的男团，人富认清事实指，「少系因为唔work，呢啲package会饿食！哈哈！」

FINALLY最近推出首支单曲《终于出歌》。

FINALLY开心为尹光演唱会任嘉宾，首次踏上红馆舞台。

《星岛头条》新网站有更多精彩内容：http://www.stheadline.com/