独家丨林保怡呼吁多年Fans买飞入场：唔好得把口《白日之下》演魔鬼院长获姜大卫赞超班

2023-11-10 07:00

58岁林保怡入行37年，在电视圈夺奖无数，最近终凭电影《白日之下》的残疾院舍院长「章剑华」，首获提名金马奖最佳男配角。保怡为角色极速增磅，又向视障人士攞料，花尽心思投入眼中的「魔鬼」角色。开心拍到好电影的他呼吁观众入场，特别是见亲佢就话好锺意睇佢做戏的Fans，「嗰啲麻烦唔好匿埋，出嚟买张飞支持吓我。」对于获偶像姜大卫劲赞演技超班，他大表感动，更对镜头笑言：「我冇请错你（John哥）食饭。」采访：杜杜摄影：Stanley 场地:K11 Art House

保怡以平常心对待入围金马，更当自己攞咗奖。

数年前，简君晋导演已邀请保怡演出《白日》，因档期问题拒绝了，之后投资者古天乐再推荐他，「之前得大纲，到古仔畀我嘅时候，我咪再认真去睇剧本，哗！呢个角色好魔鬼，正呀！哈哈！」又指最终可以合作是缘份，「若干年前接咗，可能唔系佢哋嚟，好似捉棋咁，一个好强劲嘅组合不经意出咗嚟，香港有套咁好嘅电影。」

保怡眼中「章剑华」是个魔鬼，要投入演出就必须喜爱他。

个几月快速增肥7公斤

保怡演绎「章院长」跟以往角色感觉大不同，「通常系呢个角色好正，我去演啦，但我系相反，我好唔锺意呢个角色，我要去演。但决定做嘅时候，我要喜爱佢𠻹！要活喺呢个角色里面，佢系有层次又立体嘅人，唔可以憎佢。」衰院长有严重弱视，导演安排他跟视障人士接触，保怡觉得斋讲唔够，邀请对方食晏，以便观察对方所有举动来模仿，「佢系20几岁嘅青年人，由佢离开座位，我跟住佢一路行，落到楼下，经过好多障碍，例如啲卡板、垃圾桶，又有好多路人，我一路喺佢后面问佢问题，佢每个小动作，我入晒落个袋再消化，跟住做返出嚟。」由于角色原型比较肥，保怡用了个多月时间增磅，「我本身73、74公斤，增到80公斤，我冇肚腩，加咗个肚腩畀我，仲有留须留长头发，去到现场再一笔笔帮我画到一层层斑白，妆都冇乜点化。」

保怡赞余香凝未埋位已好入戏，「佢喺现场唔系好睬我，好入戏，好憎院长。」

跟梁雍婷首合作的保怡，互动够过瘾，「好锺意佢做啲冇预期出现嘅嘢。」

希望粉丝唔好得把口

2004年保怡凭TVB剧集《金枝欲孽》首夺视帝，2010年再凭剧集《掌上明珠》，获得《亚洲电视大奖》最佳连续剧男主角。1986年已加入影坛的他，直到《白日》才首获电影奖项提名，「如果畀我早啲拍电影，都会早啲有提名，冇机会咋嘛！香港有好多好好嘅演员，唔止我，不过冇机会，希望各个老板可以畀多啲机会大家，新故仔，新题材，新角色，畀多啲新演员，我呢啲做咗咁多年差唔多。」保怡觉得今次好幸运，遇到好角色、好剧本和好对手，最难得写实题材仍有老板肯投资，「我好知足，好开心快乐，我当攞咗奖。」保怡又认为心态最重要，「攞咗奖我又要搵地方摆，个柜都已经满晒，哈哈！讲笑啫！多个奖一定系开心，但有与冇，我呢度（心）已经有咗，呢种心态好耐之前已经有，一定要满足知足。」他更呼吁粉丝买飞入场支持更实际，「有好多街坊，或者好多见到我话好锺意睇我演戏，嗰啲麻烦唔好匿埋，出嚟买张飞支持吓我，唔好成日得把口。」

2004年，保怡凭《金枝欲孽》首夺视帝。

2010年保怡凭《掌上明珠》，获得《亚洲电视大奖》最佳连续剧男主角。

多谢偶像姜大卫赞好

在《白日》演院友的姜大卫（John），接受本报访问时力赞保怡角色难度高，「𠵱家个个闹院长，唔系闹林保怡！就系做戏做得好，将观众带入角色，去闹个角色佢就成功。」更称的确较自己更应得到提名。对被前辈高度赞赏，保怡相当感动，「你一提到John哥，我好认真听，因为我好细个，姜大卫老师已经系我偶像，爸爸带我去睇佢套《十三太保》，John哥攞影帝，我都只系一条毛啦！哈哈！」承认院长角色难演的保怡越讲越满足，称从John哥的一番话学到好多嘢，「John哥做得好好，佢将好平凡嘅角色，做到好有层次，好有喜怒哀乐，佢加咗好多嘢落去，例如抢佢（余香凝）支烟，系好有经验演员先做到，John哥咁讲系赞紧我，我系全收嘅，多谢！我冇请错你（John哥）食饭，哈哈！」