头条戏场丨《无处逢生》史上最忙女主角

抗拒唔到求生类电影，如《劫后重生》、《127 小时》及《珠峰浩劫》等等，见到Netflix出品的西班牙惊悚片《无处逢生》海报，一个海中飘浮的货柜加一个女人，唔使睇介绍都知发生乜事。冇错，为逃离惨遭极权暴政摧残的国家，大肚婆同老公选择偷渡，然后老公冇咗，大肚婆困在本用作匿藏的货柜，孤零零一人漂流在汪洋中，叫天不应惨到黐线。撰文:廖思慧
 

Mia本来好依赖老公，但漂流嘅一个月令佢急速成长。

Mia老公，好快就死咗。

求生类电影离唔开为主角制造无数希望同绝望，观众边睇边谂发生在自己身上会点做?《无处逢生》多少少新意，由拎过哥雅奖（西班牙奥斯卡）最佳新演员的Anna Castillo饰演女主角Mia，偷渡客死剩佢一个，身上得少量水同食物及数个装满货的木箱，内有大量食物盒、卫衣、胶纸同earphone等，Mia发现全部唔食得相当失望，但去到后期，以上所有被Mia视为废物的货品全部都派上用场，仲救佢一命，绝望变希望睇到好肉紧。

Mia身处的国家要排除冇生产力嘅孕妇同细路，所以同一班大肚婆著草，但死剩自己。

Mia从货柜嘅窿向外望，是唯一连接世界嘅方法。

望出去得个海真系灰爆。

 

因为得Mia一个，入水速度唔算太快，但都吓餐死。

Mia就系匿喺呢个货柜喺大海飘足一个月。

会睇到大叫
全片最丧系Mia喺入咗半箱水的情况下生仔，使唔使咁惨先?唔止呀，加上行雷闪电又横风横雨，个货柜摇摆如海盗船，生仔前中后期都好触目惊心，睇到不断唞大气。我对于血腥有个奇怪位，即系打到爆头同断肢嗰类我系OK嘅，但夹硬剥牙呀，突然鎅亲见肉嗰啲就接受唔到，戏中有幕大癫镜头，就睇到唉唉声。

Mia绝对是史上最忙女主角，从来都话睇戏唔好驳戏，但真心疑惑，可以生火点解唔烧鱼食?电话旧电超级长命，OKOK再驳冇人拍戏，电影偏长，Cut短半个钟就非常好嘞。

最大反驳位，冇叉电成个星期都仲开到电话。

唔想咁快入水，用胶纸遮住啲窿，顶住档先。

全靠有B，否则Mia应该一早放弃求生。

《星岛头条》新网站有更多精彩内容：http://www.stheadline.com/