独家丨向展鹏信佛习惯被攻击：话我又唔会死 参加《好声音2》被起底澄清年薪唔止千万

《中年好声音2》60强参赛者向展鹏（Jeffrey），因爸爸向华荣是向华强及已故向华胜的4哥，家族背景加上本身是保险界猛人，一曝光即被网民疯狂起底甚至攻击，信佛的他早已习惯闲言「你话我又唔会死」，但同时搞笑澄清年薪绝非传闻的过千万「起码都一个double」。年青时青靓白净的他，曾获向华胜安排拍电影《十兄弟》，但他嫌造型丑，临时翘起阿叔，认真大胆！采访：杜杜 摄影：Stanley 发型:@hairduo_hk Billy Cheong 化妆:Claudia

Jeffrey在私人会所，身穿价值数10万的鸵鸟皮褛访问，相当贵气。

父母爱低调，Jeffrey出Po都唔会见到父母正面。

 54岁的Jeffrey，当年完成英国大学的工商管理课程返港，一心想入行当歌手，但向来低调的父母不太赞成跟他约法三章，「畀两年我，一定要出到碟，出唔到就唔该唔好发明星梦，正正式式搵份工嘞！」当时他差点跟几间唱片公司签约，「爸爸识叶志铭（叶玉卿哥哥），我入过飞图一段时间，准备签约。」之后亦有接触过华星和BMG，经理人就有小美和他契叔许愿，但全部都是无疾而终。

Jeffrey行街时获星探发掘，做过兼职模特儿。

偶像派拒演「遁地八」

1995年Jeffrey在叔叔向华胜的帮忙下，终有机会拍电影《十兄弟》（锺镇涛和张敏主演） ，「我想唱主题曲，冇谂住做『遁地八』，佢就话『你可以双线发展，拍吓先攞个机会』。」但造型令他却步，「导演李力持一定要我戴个好似林亚珍嘅圆眼镜，好厚有好多白色圈，我要唱歌个形象好紧要，系偶像派！」但他跟阿叔反映都冇用，「阿叔同佢拗，佢都系坚持，但畀我最后个镜头可以除眼镜，我心谂『你玩我咩』，于是临出发我话唔拍，都搞到几麻烦，阿叔即搵第2个人做罗！」最终「遁地八」由宋本中饰演。

 

Jeffrey年青时外形不俗，难怪发明星梦。

Jeffrey跟已故叔叔向华胜关系密切，仍不时到北京探望婶婶。

跟父母约定时限届满，Jeffrey歌手梦醒睇报纸搵工，面试时才知是保险公司，本来家人反对他做，但他听完介绍觉得好适合，「保险系多努多得，学无前后达者为先，勤力啲叻啲就可以爬人头，又可以良性竞争，1000个实习生有能力，1000个都可以升晒经理，哗！乜个世界有啲咁好嘅工㗎咩，我仲要求第2日即刻返工，就做咗20几年。」已是资深区域总监的他，在保险界获奖无数，有指年薪过千万，他就笑着话：「唔止咁少，我𠵱家要澄清，起码都一个double，总之冇1000万咁少，唔会系单数罗！」

生活富贵的Jeffrey，做了多年马主。

做保险听尽闲言闲语

Jeffrey燃起放低20多年的歌手梦全因要参加保险业的慈善歌唱比赛，经老友梁思浩介绍认识歌唱老师，「佢哋听咗我唱歌，问我点解唔参加《好声音》，可能嗰晚饮咗啲酒，就听佢哋讲报咗，又入到100强，好多嘢都系推出嚟。」参赛目标是攞第1的他，现在每星期上3堂，每堂4小时学唱歌，日日跑步吊声练气，更推掉所有饭局，「我9月生日，跟同事关系好好，每年食生日饭食4个月，今年同佢哋讲咗唔食，我要减肥。」

多得老友梁思浩鼓励，Jeffrey才决心参加《好声音2》。

入围后即被起底的Jeffrey，完全感受到黑粉的威力，「思浩话我听，啲人放我啲嘢上连登攻击我，攻击性都好犀利，又讲我姓向，话我系咩社会，又话我买通晒，好多粗口系咁闹，好似后尾连登admin做咗嘢，第2日同事上去睇冇晒。」不过他早有心理准备面对压力，因家庭背景，做保险多年仍不时被攻击，「做保险头1个月就攞第1，做咗8个月全东南亚第2名，咁多年都系头10名，全公司我攞过2次第1，做得好就会有人唔抵得你，都话咗20几年。」

从事保险业20多年，Jeffrey获奖无数。

Jeffrey最嬲这些攻击诋毁他的家族，还抹杀了多年努力，「『佢屋企大把钱，姓向㗎嘛，佢个阿叔跛㗎嘛，买1张单都够佢几年』，其实全部阿叔都冇同我买保险，我做咗咁多年唔多过5个亲戚同我买，最大嗰张保单都系13万港元1年，其他嗰啲系1至3万，唔会帮我成功到，但系攻击我嘅人就有好多。」他最估不到同事讲得更狠，「『你尖沙咀好恶㗎喎！几时请食饭，你食饭都唔使畀钱㗎啦！你唔好再呃屋企，你肯定系阿爸阿妈帮你买，你呢啲大少爷鬼做到呢啲生意咩，你呢啲人玩1、2年就唔玩啦！』」面对这些恶言，全家信佛的他早已看开，「你话我又唔会死嘅，如果你咒得我死，我死咗好耐啦，哈哈！我屋企个个都系信佛，好信因果，我妈咪话有啲叫做口业，批评人攻击人系犯咗口业，要自己承受返。」

 

去年，Jeffrey获颁「资深区域总监—杰出表现大奖」。

《星岛头条》新网站有更多精彩内容：http://www.stheadline.com/