星8卦｜「高大」被「空灵」抛弃急娶妻疗情伤增肥唔准扮靓变态虐待「秀丽」

2023-09-29 11:00

如果要数，「高大」最锺意梗系「空灵」，奈何自己学历低，对方要搵嘅系有个值得依赖嘅靠山，结果爱到要生要死，佢突然搵咗隔离公司嘅「阔佬」，仲生埋个女。不过「空灵」太古怪，竟然连女都唔要就出走。

「高大」受到情伤，自知卑微，但已经好红，随手搵乜嘢女人都容易上手，佢竟然搵咗最早期已经迷恋自己嘅「秀丽」，同「空灵」最相似系高大身材好，两个人行出嚟好吸睛。两个人喺埋一齐唔够3个月就结婚，「秀丽」可以延续初恋梗系开心，但都无谂过「高大」会咁快求婚，基于年轻自己又锺意，怕乜博一铺，亦无谂对方动机。结婚初期，3个月啦，「秀丽」都觉得自己系世界上最幸福嘅女人。

但其间佢都发觉「高大」妒忌心特重，唔畀自己出街之馀，更加唔畀自己扮靓，最好就肥多十磅，对于一向注重外表嘅「秀丽」嚟讲真系好难接受，佢有时偷偷化下妆都俾「高大」话唔知想去姣啲乜嘢人，有时唔食嘢想减下肥，「高大」就喺旁边睇实话佢越肥越可爱。一个连外表身材都无权控制嘅人，心理唔出问题至奇。

喺「秀丽」体重比结婚前增加咗30磅嗰朝，佢就决定同「高大」摊牌，尤其系佢知道老公心里面始终记住另一个女人，于是同「高大」讲要离婚。最妙系「高大」一味沉默，完全唔畀反应，拖咗两个月，「秀丽」搬走，仲寄埋分居书畀佢，但「高大」一直都无签，几年嚟「秀丽」一直催佢签，但「高大」就好似无事咁，激到「秀丽」生虾咁跳。