独家丨林夏薇激赞周嘉洛系笋盘 识睇眉头眼额又有担当
2023-08-23 07:00 
36岁林夏薇跟28岁周嘉洛无论现实还是剧集《宠爱Pet Pet》中，同样相差8年，女方最初担心沟通唔到，结果现实比角色更快「挞着」，话咁快friend咗，更约定下次拍档唔卖「甜宠」，要玩忠奸对立过戏瘾。采访：杜杜 摄影：谭志光 发型:hairculturehk seiko(薇薇) 化妆:江中平(薇薇) 场地:Studio Meta
薇薇对于跟嘉洛合作冇乜信心，「虽然同佢唔系差好远，但合作开嘅对手都比较年长，惯咗嗰个模式，唔知同年轻一代合作系点样。」另外，薇薇对姐弟恋亦有点抗拒，「我锺意比较成熟稳重嘅感觉。」不过她说私底下的嘉洛很成熟，令她改观，「我拍摄时已冇担心，观众跟住剧情发展，会锺意我哋呢pair，有人话似韩剧《经常请吃饭的漂亮姐姐》，呢套剧的爱情浪漫细节位，绝对唔会输畀韩剧，我哋都度咗几多感动又浪漫嘅场口。」
嘉洛唔介意对象大20年
嘉洛曾跟大几年的对象拍拖，对跟姐姐相处有信心，「年龄对我嚟讲唔影响爱情，只要当下感觉，其他嘢夹到，大廿年都冇问题，外表大家最终都会皱皮。」讲到跟薇薇相处，他大卖口乖话唔觉相差8年，「有时觉得自己大过佢，佢好佻皮，又跳跳紥紥咁。」薇薇就赞嘉洛好善解人意，「佢好识得睇眉头眼额，我都怀疑佢系咪识得读心，笋盘嚟，又有担当，真系隆重推介。」嘉洛就笑着向薇薇解释：「我唔系个个都睇到，但系你太容易理解，拍摄时佢有犹疑唔出声，我已经知佢有唔妥，因为佢平时好爽快。」
两人合作愉快，私底下亦有联络，嘉洛仲话会迁就恨演反派复仇角色的薇薇，「如果佢想演反派，我一定演忠，咁样先可以多啲对手戏，做对手好玩过同一阵线，我想我哋都咁好玩。」薇薇就相信愿望成真，「喺访问许愿就会有，好似我话好锺意做律师，《法言人》就做到。」
《星岛头条》新网站有更多精彩内容：http://www.stheadline.com/
最新回应