星8卦｜「大眼」被奶奶嫌尅夫「空心」生意失败姓赖抛妻弃子

2023-08-22 11:00

「大眼」条命真系好坎坷，当日参加比赛攞咗奖就俾「空心」𥄫中，因为做开顺得人行业，所以好识服侍老细。「空心」一直都好玩得，去到呢个时候就想定落嚟。而之前嗰几个女人都好旺「空心」，靠食老窦畀自己嘅生意都赚到唔少嚟沟女。问题系「大眼」一见到「空心」阿妈，老人家即刻同阿仔讲呢个女人对眼唔多祥和，恐怕会令到「空心」事业唔好，即系直啲讲句系尅夫罗！

但「空心」唔信邪，觉得自己都做得好掂，面面俱圆，商场上好多人畀面自己，做嘢靠实力啫，坚决娶「大眼」入门，奶奶一直对佢面色唔好，十分嫌弃，就算生咗几个仔都无一日觉得满意。「大眼」一直好委屈，但老人家唔知系咪真系见得人多，竟然俾佢讲中，「空心」因为一单大陆投资唔见咗半副身家，要老窦出手救，呢个时候突然醒咗赖「大眼」陀衰家，仲喺上面有埋个妹妹仔。

「大眼」一时忍唔住，提出离婚，奶奶第一时间赞成，仲要连啲孙都唔理，「大眼」一个女人仔而家带住几个细路，「空心」又无钱畀，惟有叫以前帮佢铺路嘅「奶妈」介绍生意，利用女人本钱讨生活罗！