独家丨Lyman KC拍广告冇底线：卫生巾都可以　玩《造星V》倒水式使钱亨仔最抵

2023-08-22 07:00

《全民造星V》冠军香胤宅（Lyman）、亚军黄家灏（KC）及季军陈镇亨（亨仔）得奖后，Fans都好紧张三人前途，跟ViuTV倾约中的他们反而唔急，食住个势拍住广告赚快钱先，暂时最受广告客户欢迎的Lyman，唔介意拍女性用品如卫生巾广告，更即场度埋桥；而跟杨安妮（Win Win）拍拖5年的KC，笑言唔敢同女艺人工作时太Close，怕生命受威胁；至于亨仔，本报日前独家报道其父母同女友点样支持佢，幸福的亨仔。采访：杜杜摄影：Stanley

KC、Lyman和亨仔大方公开有另一半，完全唔担心影响圈中发展。

有小女孩录音留言表示锺意睇Lyman跳舞，佢好开心亦希望演出令到下一代都锺意跳舞。

对于未来工作方向，Lyman和KC都坚持以舞行先，KC说：「公司都觉得可以试吓用跳舞呢个媒介，睇吓做到啲乜嘢。组团就最紧要风格match，有时个人有时一齐，又可以做啲promotion，用跳舞去做节目，好多跳舞人都有啲综艺感，如Stick哥（《造星V》林昆乐）讲嘢真系好好笑。」亨仔就倾向夹Band，「呢个阶段未咁适合个人发展，仲同公司倾紧，睇吓佢哋制唔制。」

亨仔最深刻留言是「亨仔又喺度乱嗌呀！」他称已吸纳意见努力改善。

亨仔羡慕Lyman拍洗面广告

因租场排舞所费不菲，加上添置道具，Lyman和KC坦认参赛以来至少花了4、5万，好彩得奖后即接广告补数，而亨仔就最抵玩，「冇乜使钱咁滞，ViuTV好好，每Round都有Budget，我哋玩音乐，可以返公司Book房，通利琴行都提供地方。」三人笑言乜广告都拍，就算女性用品都冇问题，即卫生巾亦OK，Lyman和KC更大方透露有帮另一半购买经验，Lyman仲度埋桥，「我有老婆！个广告可以话family man都要帮老婆买。」KC补充：「虽然我伴侣有大把M巾，我谂紧我拍会点拍，哈哈！」KC最爱Pokémon，开到口想拍card game广告，「我见台湾有，好想要，每个月寄畀我抽吓，过吓手瘾都好。」亨仔喜好就最易估，「我想拍做gym运动衫、裤嗰啲。」KC就提议，「你卖能量饮料，饮完喺度嗌！」而Lyman就最Like配合其life style的广告，亨仔即表示羡慕他拍洁面用品广告，「我都好想试吓拍洗面嗰啲，哈哈！」

三子讲起拍广告好雀跃，就算拍卫生巾广告都完全唔尴尬。

Lyman最满意《B.A.D.》演出，最唔想睇返《Master Class》，「我哋乱砌啲嘢出嚟，系开心但唔想睇返。」

KC最锺意自己的solo演出，最怕睇返《创作者的派对》，「走音好碍耳，好难听呀！」

亨仔最深刻留言是「亨仔又喺度乱嗌呀！」他称已吸纳意见努力改善。

Win Win同KC互做树窿减压

KC女友Win Win在强尼主持的《Viu Chat》提到，入行后不堪压力，做完节目返屋企会狂喊，KC表示当时扮演陪伴角色，听对方倾诉，「最紧要帮佢食咗啲负能量，佢主要唔开心系少咗好多跳舞时间，又觉得自己做得好差，同佢讲系学习，下次做得更好，同埋要学识控制好啲时间。」他承认当时有吓亲，原来入行咁大压力，但冇因此放弃参赛，「困难同惊系必然要面对嘅嘢。」到他参赛，就同Win Win调转树窿角色，虽然私底下冇镜头前喊咁多，但一样有好多不安，「好似变咗一条冇主见嘅咸鱼，好需要一个人去话畀我听系啱，对自己太冇信心。」

KC最开心有小朋友在街上大叫他「蓝毛毛」，上月收到留言祝他「happy new year」就最离奇。

KC不担心因工作要跟女艺人亲密接触令Win Win呷醋，反而是自己怕丑。

KC自爆曾呷193同Jeremy醋

跟Win Win情侣关系深入民心，讲到日后要跟女艺人合作仲要有亲密举动，KC就笑言：「个包袱唔系人哋接唔接受到，而系我做咗，生命会受到威胁。」他唔担心Win Win会嬲，「会有少少耍花枪嗰种，『同其他女仔得啦』，但系唔会真嬲，反而我对女仔会好怯，会变鹌鹑。」Lyman好肯定唔担心太太Zoe呷醋，因已经历过，「开始拍拖时倾过，我跳拉丁舞比赛，又要拖手、hold住个partner，最初佢有啲唔开心，但只舞系咁跳，𠵱家佢都系一个artist会明白，佢要做戏同对手锡、揽，就要professional，我入咗个戏，又要谂我老婆O唔OK，同对手好难投入。」KC就自爆曾呷193醋，「Win Win拍《困兽斗》同肥仔一对，有时讲笑话锺意193、Jeremy，我都会（即场翻白眼），但系唔知点解又会trust佢，觉得系冇问题。」