独家丨《造星V》亨仔豪爽认热恋：佢好锡我 港大女友首访问唔惊男友多女埋身

本周日，《造星V》嘅最后舞台，三甲Lyman、KC、亨仔联同一众参赛者，齐现身九展出席《全民造星V Summer Live 》。着住靓仔礼服的26岁亨仔再次自弹自唱Pre-round的《寂寞先生》，不安感冇晒，高音稳定及穿透力之强，完全做到当日豪言的一句「用歌声震慑大家」。在现场听到囝囝及男朋友得到热烈掌声及欢呼声，亨仔父母同女友Yannes开心接受《头条日报》独家访问，曾称未获爸爸赞过一句的亨仔留意返，亨父咁样讲，「进步咗，而家OK啦。」而女友亦好戥亨仔开心，对于日后男友会获万千女Fans埋身，Yannes甜笑表示:「我唔惊。」成个访问又甜又Warm，恭喜亨仔。采访 :廖思慧、杜杜

《全民造星V Summer Live 》中，亨仔再次自弹自唱Pre-round的《寂寞先生》。

高音稳定及穿透力之强，完全做到当日豪言的一句「用歌声震慑大家」。

亦有跟希晋及Jason等夹Band。

亨仔唱歌感染力真系好强。

好似睇紧外国Band，大只佬弹结他。

期待亨仔开个人演唱会，麻烦到时留两张飞畀我吖。

好记得比赛时亨仔话自己弹结他麻麻，最憎人讲大话罗。

26岁唱得又大只的亨仔（陈镇亨），基本上在《造星V》由头带到尾，虽然跳舞属弱项但都努力摇摆身体，肯努力别人一定睇得到，特别是亲人。亨仔讲过冇自信全因唱歌从未获赞赏，陈爸爸亦未赞过一句，至打入十强才自信返晒嚟，「好开心大家认同我把声，原来我唱歌系好听。」

要数《造星V》最洋葱画面，呢幕头三名冇走鸡。

亨仔父母狂Loop比赛片段

《Summer Live 》完场，亨仔父母及妹妹在场外的亨仔应援区影相，见证囝囝得奖后首舞台，父母笑住答应访问，提到正于港大修读机械工程4年级的亨仔公开话过，想唱歌但不获爸爸认同，𠵱家心态有冇变到?「𠵱家OK啦，希望佢顺利，始终读紧书，希望佢完成学业先，佢选择行呢条路，都行得几好，OK啦。」亨父笑言自己都几Harsh，「爸爸妈妈都会严格嘅，希望佢将来行条路会顺利啲，自强不息吖嘛，系咪先?」赞囝囝进步好多好多，目前是头号Fans的亨父，最爱亨仔在总决赛跟Winka合唱的《手心的蔷薇》，「好锺意，每日都听，哈哈哈。」

亨妹及亨爸在场外应援区影相留念。

亨父赞当晚个个《造星V》囝囝都唱得好好，「唔只亨仔，个个都好似好专业。」记者指亨仔同爸爸好似样，亨父即说，「佢靓仔好多。」

亨父最爱亨仔在总决赛跟Winka合唱的《手心的蔷薇》。

在亨妹的IG见到亨仔父母无论搭车定出外食饭都机不离手，画面当然系亨仔的比赛片，搞到妹妹笑两老「超级夸张，每次睇都好似第一次睇。」甚至诈型，「可否理理你们的女儿?」(笑)问亨仔父母有冇说话想同囝囝讲，温柔的亨妈说，「妈咪会全力支持，放心努力追梦。」而全程Keep住笑容满面及一直搭住亨妈膊头的亨父说，「Daddy都支持佢。」

亨仔父母无论搭车定出外食饭都挂住睇片。

亨妹诈型，好好笑

亨妹笑父母：「超级夸张，每次睇都好似第一次睇。」

大学女友鼓励参加《造星V》
《造星V》三甲日前接受本报访问，对于亨仔曾上载一张同女生毕业合照到IG，问是否女友?亨仔大方认拍拖，「系我女朋友，拍咗两年半拖，Hallmate但唔同系，佢好支持我参加《造星V》，话你再唔揿报名，我就帮你揿报名。」拍拖开心事，亨仔唔隐藏，「咩都同佢讲，我冇嘢食，佢拎嘢畀我食，好锡我，好支持我入行，Fans都知道，仲知佢系fans club admin。」

亨仔上载同毕业女友合照到IG story，被网民指公开认爱。

冇谂到亨仔咁坦白认爱，仲愿意透露更多，亨仔性格真心好。

亨仔在访问称IG一早放同女友嘅合照，拍拖不是秘密。

Yannes今年毕业于港大食物营养系，睇佢拎住嘅毕业袍「生啤」，亨仔真有心思。

亨仔抱住女友转圈嘅行为好搞笑。

希望男友唔好有咁多挫折
九展场外见到亨仔靓靓女友Yannes，对于当日支持男友参加《造星V》又见到支持者越来越多，Yannes好感动，「一路以嚟觉得佢值得呢个舞台，冇谂过佢参加呢个比赛会有咁大回响，终于有人欣赏佢，好戥佢开心，希望佢一直顺利，唔好受咁多挫折，会一直支持佢。」

问亨嫂最锺意亨仔边首比赛歌，「拣唔到，首首都系咁loop，solo嗰啲特别锺意。」

《造星V》首个记招，女友同亨妈现身撑亨仔。

女友在台下派心畀亨仔。

女友见到亨仔Fans整咗好多应援好感动。

因为首见传媒亨仔未有粉丝应援，所以女友及好友先可以轻易埋身。

对于男友喺《Summer Live》表现，女友畀1000分。

女友离远同亨仔挥手，使唔使咁浪漫呀。

女友眼中的亨仔。

《造星V》开播前举行记者会，亨仔一家及女友已经去撑场。

女友是亨仔Fans Club的早期Admin。

Yannes话多咗好多Fans帮手搞Fans Club事务。

Yannes称睇男友Pre-round睇到眼湿湿，总决赛现场睇更加感动，「见到佢喺咁大嘅舞台都挥洒自如。」Yannes又透露亨仔比赛期间当然会有压力，「佢会系咁问我，唱得系咪唔好听呀?边个位好差?其实佢系咪真系得㗎?佢好多呢啲问题。我就同佢讲，你得㗎，啲人都话你好听呀，因为多人同佢讲唱得好听，承受压力高咗好多。」至于如何为男友减压?「打吓机倾吓电话已经好减压。」最后提到亨仔会越来愈越多女Fans埋身，会唔会好担心?已经见晒家长的Yannes甜甜笑表示，「我唔惊㗎，哈哈，我真系唔惊㗎，我对我哋感情好有信心。」

著短裤嘅亨仔好似最顺眼。

（左起）亨妹、亨嫂、亨仔及亨妈，等到夜晚11点半终可合照，但亨爸因为要返工所以走了。

亨妹好识做，本来企亨仔隔离，影完几张相即同Yannes调位。

亨妹生日，亨仔带埋女友齐庆祝，生日快乐呀十冰。

忙完《Summer Live》，亨仔终于可以暂时唞吓同家人跟妹妹庆生。

 

【《造星V》囝囝被围】：

当晚王锋父母都有入场撑囝囝，锋妈仲送咗应援畀记者，好sweet。

Lyman本来想同应援影相，但因太夜已拆，佢一现身全场尖叫。

唔系排队买平楼，系排队影相。

长龙之王就系Adams。

Tsoul好锡Fans弯晒腰自拍。

当晚完场后，Tsoul出咗去场外几次满足Fans合照要求。

王锋都有好多Fans围住。

Owen仔Fans层面好广，有婆婆粉又有妹猪粉。

 

 

《星岛头条》新网站有更多精彩内容：http://www.stheadline.com/