星8卦｜「微微」靠男人上位飞「型仔」被唱一拍两散

2023-08-18 11:30

「微微」最近完全唔见人，因为真系遇到一个自己收服唔到嘅男人，仲非常伤心𠻹。自细「微微」就好有男人缘，话说第一份工就搞到两个男神为佢大打出手，结果佢无事，仲可以越做越上位，其实系男上司对佢生滋猫入眼，心存偏袒亦十分有私心。

之后「微微」想转型，即刻搭上「型仔」，将佢大改造变咗另一个人，事业亦一帆风顺。好多人都话「型仔」系贵人，但佢亦好识使钱，喺埋一齐嘅几年，「微微」搵到好多，「型仔」亦使得好疏爽。有人去过「微微」屋企，打开衣柜一睇，全部都系「型仔」嘅靓衫，件件过万，反而「微微」平时着嚟着去都嗰几件，现实生活好知悭识俭。到自己企稳脚，「微微」又去挞着另一个制作人，「型仔」梗系唔忿气，于是周围唱「微微」姣又骚，借男人上位。

不过制作人性格比较怕事，帮咗「微微」一阵就即刻自己提出分手，话顶唔顺压力，「微微」从来都系对男人有十成把握，个个都爱到要生要死，今次俾制作人飞，心理上真系过唔到，无面系最大原因，最惨已经俾「型仔」唱到形象好差，而家仲要做埋爱情输家，一心谂住可以靠实力重拾江湖地位，但无咗可以帮自己嘅靠山，唔收埋一阵又点见人呢！