禁冷气嘅秦始皇？林超英自称非死硬派：生存系第一条件︱Kelly Online
2023-08-06 22:13 
曾明言「如果自己系秦始皇，一定禁冷气」嘅天文台前台长林超英，出席网上节目时再一次回应网民关于「开唔开冷气」嘅疑问。林超英强调，自己唔系死硬派，生存系第一条件，自己亦都唔系「绝对主义」，会面对现实，笑言「如果知道自己会死，梗系会开啦。」
冷气开几度？交几钱水电费？
林超英素有「环保达人」之称，唔开冷气嘅习惯街知巷闻，对于佢几时会开冷气，如果开又开几度，网民都好好奇。林超英指，自己一早讲过，客人嚟有需要就会开，好似孙女嚟咁，会按佢父亲要求开，但佢哋走咗之后就会熄。咁冷气开几度？林超英话：「27度。」
天时暑热连冷气都唔开，咁电费咪好平？林超英话，自己交0蚊电费已经3年几，就算水费都只不过系10几蚊。至于点走上「节约之路」，林超英指自己做天文台台长嗰阵，气候变化成为无可抗拒嘅事实，自己早年都唔知气候变化，但去到2000年睇到数据嘅时候就无可争辩。
「我都会怕热，但接受出汗呢个事实」
林超英话，佢都唔系一开始就完全唔开冷气，系逐步逐步嚟，去到今时今日已经有十几年完全唔开冷气。佢质疑好多人根本无经历过无冷气嘅年代，而家只不过系变返原始起点。不过，佢都明言自己都会怕热，但佢接受出汗呢个事实。
林超英系节目入面都讲出一个令人震惊嘅习惯，就系佢一条裤竟然可以著成个月。佢咁解释：人流汗通常都系集中喺上身，下半身都唔会出汗，呢个系生理结构。佢仲话自己系「用科学原则指导自己嘅生活」。
---
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应