专栏｜女足世界杯睇实英美德

女子世界杯即将开幕。无疑，女足号召力无男足咁厉害，但近年女足水平不断提高，组织传控有番咁上下，有靓女睇就锦上添花啦！

先讲夺标大热门美国队，绝大部分球员嚟自本土联赛，年纪都偏大，但对上8届有4次成为冠军，实力举足轻重。有咁辉煌嘅成绩，全因13号前锋阿历士摩根嘅强劲入球能力，代表国家队上阵207次入121球，系目前球队入球最多嘅球员，唔好睇小呢位34岁嘅妈妈，速度同入楔能力非常出色。

英格兰前年改由域雯执教，结果拎到史上第一个欧国杯，呢位荷兰籍领队功力相当深厚。球队虽然有东妮、罗素等新星崛起，但缺少经已挂靴嘅入球机器爱伦韦特，攻力可能打啲折扣。

欧洲传统劲旅德国队，大部分球员嚟自拜仁慕尼黑同禾夫斯堡两大国内强队。值得留意嘅系队长兼首席射手波普，瞻前之馀亦会顾后，经常勤力回防，系球队嘅定海神针。20号中场马古嘅进攻能力，同样唔能够睇小。

西班牙、荷兰同东道主澳洲都值得留意，艾尔有机会再同各位分享。总之，今届女足世界杯相当精采，大家一定要睇实「猜波台」嘅直播呀！艾尔

-----

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ