独家丨「亲生仔」王锋 KC Nathan绝密心底话《造星V》十强为负评大平反

2023-07-05 07:00

《全民造星V》总决赛将于16日举行，投票占评分50%，网民支持相当重要，不过节目播出七星期以来是非不断，特别是被网民封为「ViuTV亲生仔」的王锋、KC和Nathan最万箭穿心。本来插足全程《造星V》的改舞事件稍为丢淡，但上周六澳门十强节目讲遗憾环节再度燃起火头，火势更令Tsoul及KC惨被恶评洗版，就算急放足本版都难以救火。《头条日报》收到消息，原来十强节目在《造星V》仍未播出前已拍摄，在未知《造星V》如何被剪辑播放的情况下，囝囝们被制作组强行要求回应，加上综合各大网上平台的毒舌评论。在拉票期间，本报特别畀机会十强，就所有批评作出大平反。采访：杜杜摄影：Stanley

《造星V》十强Lyman、Ash、KC、Tsoul、Nathan、Taco、王锋、Snoopy、亨仔和希晋，出席完周日下午的拉票活动后被传媒轮访，众人面露倦容。

王锋被严重网络欺凌冇晒光彩
堪称《造星V》「负评王」及「ViuTV首席亲生仔」，昨日27岁的生日的王锋，因在澳门十强节目喊住讲返改舞事件，被网民斥猫哭老鼠，一众键盘战士要求他退赛之声不绝。其实当时《造星V》未播，王锋经兄弟们鼓励讲返改舞事件讲到流晒眼泪变晒声，相信佢嘅喊系来自内疚及怀疑自己为人，绝非刻薄留言所讲喊俾网民睇博同情。

王锋在十强节目爆喊重提改舞事件，网民闹佢猫哭老鼠。

而被负评折磨及被严重网络欺凌到冇晒光彩的王锋，承认事件好难补救，「其实都冇话平反，的而且确我系做错咗，其实我都想去补救，无论系关系（跟阿泽)，大家对我嘅谂法，但系最主要都系道歉为先，其实系我同佢之间嘅事，我有不断同佢私下沟通，都希望大家尝试从我嘅立场同角度去睇，好多人有佢哋嘅谂法，好难去说服佢哋，而呢一刻做好个表演，做我自己最锺意做嘅嘢。」

至于会否退选平息民愤？王锋认为唔可以拉埋嚟讲，「反而我会更加珍惜呢个机会，我都希望有一个更好嘅我，同埋畀大家睇到我嘅进步或者真诚。」对被指ViuTV亲生仔及契仔，王锋认为是剪接上的错觉，「我睇到啲comment话某啲人成日出场会拍手，有啲成日企C位，我会觉得呢啲系幸运，自己好彩，其实大家都有实力，觉得呢个称呼被大家定型咗，我就唔系咁睇嘅。」

叫王锋讲吓最难受的评论，「其实每句都好难受。」

KC「邪念」论被误会觉得受伤
因为女友是Win Win，KC（黄家灏）被指唱歌走音，Only跳舞叻都可以由头带到尾，更因比赛期间有大量镜头而被封「亲生仔2号」，他重申唔觉节目组对佢特别好，点剪辑亦唔到佢决定。「比赛入面净系做好自己，我意思系阻唔到佢哋咁样讲，当然我冇参与剪接啦！所以我绝对系作为一个参赛者去参与呢个比赛。」

因Win Win男友身份，KC甫参赛已开始被网民攻击。

问到努力比赛惨被转移视线，KC坦认有少少唔开心，「觉得都有少少个集中点去咗个事情嘅真伪，有啲人可能好firm咁讲，有啲人好猜测咁样去讲，咁我觉得都要睇我表演，都要睇我create嘅嘢，你哋觉得唔够好或者有咩唔好我都会听。」

讲到澳门十强节目的言论，KC无意判断谁对谁错，「邪念系胜负带畀人谂多咗嘅嘢，喺我嘅世界真系只系得做好自己，而呢个系份内事，所以点解当初我话呢件事系悲剧呢，就系因为胜负呢样嘢分开咗佢哋。」对于发表意见被狠批，KC觉得被误会，「但系is OK，我只系喺镜头前讲咗一啲对呢件事嘅想法，每个人都有佢嘅答案，其实当下讲嗰番说话，大部份我系表达一个感叹嘅感觉。」

KC在节目表达意见被围插，坦言有少少受伤。

《造星V》播映共七个星期，KC一直被网民重点关注，问他适应入行未？他坦言，「我都仲谂紧我系要适应呢样嘢定系唔要适应呢样嘢，好多人喺我ig po讲好多佢哋嘅谂法，我知道自己想讲啲乜嘢谂紧啲乜嘢，我唔会怪佢哋，清楚自己谂乜就OK。都系嗰句会有少少受伤，但系我会明白。」

KC认为努力比赛及为表演做创作，却无奈被是非模糊焦点。

Nathan认甩舞学识自恋撑自己
比赛喊足全程的Nathan（魏念恩）同样周身箭，除女友离世事件外，40强跳舞BATTLE甩舞要望队友，以及被指得个样及打鼓冇力。贵为连登仔的他笑言睇晒有关负评，仲样样都想回应，承认甩舞之馀更Proud Of喺连登经常见到自己的甩舞Gif，觉得炸裂的他兴奋解释，「我唔系望佢哋舞步，系觉得要同兄弟有眼神接触，但就系望嗰吓甩咗嘞！」挂住同班兄弟Chill的他亦满意自己表现，「讲真我系炸嘅。」（有工作人员唔认同）Nathan没好气，「入呢个节目第一样学嘅系自恋，疯狂赞自己，呢个世界、节目太多负能量，自己都唔撑自己，冇人会撑你。」

Nathan（右一）因想同队友交流而分心甩舞。

提到Nathan得个样，亨仔突然插入：「你就好啦有样！」全场爆笑！但Nathan对此就唔认同，「我就唔觉得我系得个样，我识玩乐器啦，我跳舞跳到吓啦，我识好多技能，我识韵律泳，我攀石有牌啦，总之都系嗰句，我改变唔到每个人嘅睇法，有啲讯息我会接收，有啲讯息我会笑。」不过他认打鼓不及Jason Loi犀利，「以前夹band都知佢夹咩band，佢亦都去好多比赛做评判，我冇将自己同佢比较，亦比较唔到，我亦都视佢为学习对象，呢啲我承认，亦系我会接收嘅评价。至于话我打鼓细力，咁我下次打鼓大力畀你睇。」

Nathan在澳门十强节目指David患情绪病，他出story认错指误解对方。

对于同样被指是ViuTV亲生仔及契仔，Nathan百思不得其解，「我究竟喺边度俾人契，我谂极都谂唔到，我喺呢个过程里面，究竟几时受过呢个亲生仔嘅待遇，哈哈！但系我觉得有noise都系好事嚟，起码有人讲罗！」提到一样负评缠身，Nathan承认有唔开心，「私人事情俾人不断拎出嚟提，一定唔开心，因为对我嚟讲系唔开心嘅事，不停咁提一定hard feeling，其他嘢我会接受，亲生仔嗰啲睇完真系笑得好开心。」笑他既然开心不如做埋上契仪式，成程访问感觉好百厌死仔Feel的他转数好快，「上咗契真系俾人话系契仔，𠵱家对我嚟讲系契仔问号，我仲谂紧有咩因由俾人睇到我系契仔。」

对被封「亲生仔」谂极唔明，Nathan笑言:「几时受过呢个待遇，哈哈！」

Nathan承认暂时跳唔到舞，但佢锺意跳舞会努力进步。

Tsoul认被闹不快负评令人进步
Tsoul（田曜诚）因在十强节目批评阿泽台上申诉，其IG被洗版式留言狂闹，被指一铺清袋的他，虽然有出Story解释剪接问题，但网民唔收货，更呼吁一票不投Tsoul。他称是节目组表示一定要答，「我控制唔到人哋点谂，知道事实嘅就知道事实，但系我哋唔会将事实摆上公开场合度讲，我觉得冇需要，要讲嘅已经讲晒。王锋临时变阵系唔啱，我都好坦白同佢讲佢系唔啱，节目组时间问题，剪接问题冇摆上所有bite好正常，想提各位系一个节目，唔会包含咁多个钟拍嘅嘢上去，如果大家要恶意误会我意思，我真系控制唔到，本身想表达王锋系做错咗，令到阿泽讲咗出嚟，就引发咗咁大件事出嚟，呢个系佢哋两个人嘅事，我哋旁人只可以听罗！我哋畀意见都帮唔到佢哋两个真系好返，我知自己为人系点，我身边朋友都知我为人，有网民想攻击我is ok，我觉得反而有攻击就有noise𠻹！」

Tsoul在节目发言被剪辑，令网民误会他插阿泽。

Tsoul因澳门十强节目言论，ig被洗版狂闹，他即出story澄清。

因为十强节目剪接问题令Tsoul被狂轰，他冇后悔讲出嚟，「嗰刻系一个问题嚟一定要讲，呢啲唔会剪出嚟畀大家睇，我同KC都系跳舞人，喺嗰刻因为节目嘅需要系要回应，我同KC其实想表达嘅嘢都系因为王锋做错咗，令到阿泽有呢啲action，我身为红组队长好坦白讲，我嗰时，甚至系之后，都系偏向听阿泽嗰边多啲，因为我同佢同组，听佢呻，但我听完都帮唔到佢，呢啲系佢两个人嘅事，作为队长，我做咗我嘅责任就系听佢诉苦，令佢feel good返少少，我可以做就系咁。」他承认有为洗版事件不快，但唔担心投票成绩，「我都系靠实力同作品说话，负评系令自己进步，人身攻击就会过滤。」

Tsoul被剪接组吓亲，完访问后向记者温柔提问：「你哋会出晒嗰访问㗎呵？」

Lyman自认不足零负评唔系好事

零负评的Lyman（香胤宅），认为太多负评唔好，但只得正评亦未必系好事，更自认有好多不足，「其实有好多嘅，唱歌啦！的确冇亨仔、希晋、Nathan、Ash嗰啲水准，跳舞其实都系嘅，我跳到拉丁舞，跳到少少爵士舞，但系好Lucky识到Dai Bon（84号胡成邦）学到唔同嘅爵士舞、jazz funk，同王锋、Adams同队，有埋locking，唔同commercial 嘅舞种，所以我的确仲有好多嘢要学。」

Lyman参赛以来一直被评高水准，但他依然觉得有很多不足。

问到被睇好夺冠，会唔会不断改决赛项目？Lyman收起笑容，「改内容就冇嘅，但对自己嘅要求的确系高咗，因为做得public figure你要有个standard，做样样嘢都好好睇睇，多咗人支持你的确系有个责任。」

被封民选冠军的Lyman零负评，反而对自己要求更高。

亨仔认同网民批团体赛隐形冇平反

亨仔（陈镇亨）就被批评首轮表现出色，但团体赛隐形，是险入十强，他表示绝对认同，唔需要平反，其他囝囝忍唔住笑，「但系我非常开心，系咁多round可以试到好多嘢，你叫我无端端跳舞冇可能，我咁嘅款，跳唱又试咗，平时冇可能会跳唱，夹band又夹到，我本身又冇band又冇盛，所以无悔险入十强，真系冇平反。」

亨仔最开心比赛有很多新尝试，譬如可以跟一班兄弟夹band。

对被批评，亨仔睇得好透，「咁我觉得如果本身已经做得好好，我就系明星，我都要接纳自己有好多缺点，我有睇好多意见，我Pre round做得好我都认同嘅，之后好多意见，都有过滤分析，佢哋都讲得好啱嘅，我𠵱家唱嘅发展方向都好单一，玩《造星》之后都有好多唔同嘅尝试，所以都有所得着，能够成功俾我入到十强都非常之庆幸。」

因为眼湿湿，被兄弟笑佢「眼瞓啫」的亨仔，认为入咗十强已无憾。

Snoopy自觉广东话大进步讲粗口好叻

Snoopy（詹仕伟）被指广东话冇进步，遭质疑投入度，他就在Tsoul疯狂提水下努力用广东话回答，「我广东话好厉害，进步好多，我讲粗口好叻，你又唔知呀！」他澄清非投入度不够，「我上一Round自己写歌、排舞，排全部嘅表演。」问到如果真系赢咗，会否留港发展？他继续边讲边用眼神向Tsoul求救，「我唔知呀，顺其自然。」再问赢咗比赛先再谂？Tsoul同Lyman一齐教佢答，「系！哈哈！」当Snoopy听到记者再问下一位，即表现出一身松晒，好好笑。

Snoopy努力讲广东话，讲唔掂就用眼神向Tsoul求救。

Snoopy不认为投入度不够，因20强演出全部自度。

Taco被指冇进步觉得赢得唔乾净
好多声音指Taco（黄泓祖）在20强比赛冇进步，更替Ritchie不值，他也认同对方很出色，但就否认没进步，「我觉得Ritchie嘅表现好正，佢哋觉得我冇进步嘅原因，系因为我用返同一首歌嘛！嗰首歌我就当佢有两部份，我只系喺海选嘅时候表演咗前面嗰part，我冇表演到后面嗰part，而我想喺20强用返呢首歌，因为呢首歌好简单介绍咗我系边个，我有咩心态，有冇进步？我觉得自己有进步㗎！我有加咗少少舞蹈落去，网民觉得我系赢定输唔关我事，我谂系裁判嘅口味啩！佢拣咗我，我只会系OK收到，我去准备下一round，所以我冇乜谂法。」他坦认有唔开心，「一定有，好似赢得唔乾净咁，但系人哋拣我一定有佢哋原因，所以我都要相信自己有啲位系好，所似佢哋先会咁做。」

Taco唔认同20强演出冇进步，重唱Pre round歌曲亦有原因。

Nathan插口：「亲生仔，呢个先至系亲生仔！」Taco即刻接到，「我不嬲都话我系亲生仔，我跳出嚟𠻹，咁个个话我Rap，又话似泰迪罗宾，但系我觉得冇问题。」记者问他是否想做亲生仔？Taco答得坦白，「我想做㗎！咩叫亲生仔？你有料咪可以罗！我嘅角度系人哋会畀咁多镜头你，咁多责任你，你有料你做到嘛！咪出嚟认吓自己叻罗！」（全场起哄）

Taco好想做ViuTV亲生仔，「人哋畀咁多镜头、咁多责任你，有料先做到嘛！」

希晋认怕丑符碌入10强决赛有惊喜

希晋（王希晋）同样被指隐形，符碌入10强，「还我Owen」讲到𠵱家，自认怕丑的他承认隐形，「我觉得隐形系梗嘅，因为我对住镜头好易会怕丑，好容易唔讲嘢，表演上我同KC佢哋一组，两个跳唱一个夹band，其实前两个回合或者Pre round，做唔到好shine嘅位，总之唔系自己最擅长嘅嘢，人哋话我隐形我真系隐形，我只想好似Tsoul话斋用实力，入咗决赛呢件事系改变唔到，一定系全力以赴，到时你哋睇到我现场表演之后，你都觉得我系咁样都冇嘢好讲。」

网民叫希晋还返个位畀Owen，他未有被反对声音打沉，叫大家等睇佢表演，「到时见啦！」

对于负评，希晋话听到好兴奋，「呢啲说话完全攻击唔到我，我觉得有唔好嘅说话先好，先会push到你，如果成个人生都系顺风顺水，我觉得冇意思，反而愈多人憎我愈隐形我就慢慢捱罗！到最后捱到呢个位畀你哋睇，到时见啦！」

希晋承认面对镜头劲怕丑，经常变隐形人。

Ash眼湿湿解释点解唱《小心地滑》
跟Lyman一样冇乜负评的Ash（卢信宥），指20强选唱《小心地滑》送给亡父被误解，他称歌曲有警戒含意似父亲教导儿子。「中间有段词系写畀爸爸，佢哋话点解送呢首歌畀爸爸，我想带出嘅message，呢首都系警戒世人如何去做人，其实好大部份都象徵住一个父亲点样去教导自己个仔，所以好想将呢个佢由细到大，车我去唱歌练习，教导我成个过程放喺呢个表演中间，佢对我讲嘅说话，中间我都写咗一段嘢，好似我对佢讲嘅一个对话。」面试时已知爸爸不适的Ash，有挣扎过是否继续来港比赛，「因为我都唔知自己可以行几耐，就同屋企沟通，去到呢个年纪，冇几多机会可以做到自己锺意同坚持嘅事，所以趁住呢个咁两难嘅时候，做返本份，两边都兼顾到，参赛时都安排好爸爸嘅医疗，完咗一轮比赛就飞返去。」