古天后日志｜20日线重要支持不容有失

6月21日，天气炎热，大致天晴，局部地区间中有几阵骤雨。隔晚美股低开低走，不过龙头股之一嘅Tesla股价因为再有车商加盟其充电站，带动股价升5%，美股亦于低位反弹，道指收市跌245点；标指跌20点，纳指跌22点，标指喺4300有不俗支持，暂时仍然算系高位整固。VIX唔算过，市场等待鲍爷今晚听证会有乜讲，睇睇会唔会从佢嘅口中，得知未来息口路径方向。

美股方面无乜特别消息，但隔晚中概股跌到一仆一碌，反映中概股嘅金龙指数跌逾5%，主要系618购物销售未如理想，大行出晒报告唱好电商股亦帮唔到手，拼多多插水7%，京东(09618)亦跌6%。虽然阿里(09988)指张勇辞去CEO一职，系为咗专注阿里云发展，但市场又未必会好放心。事关有消息指，马云对于目前阿里状况相当担心，怕失去其龙头地位，喺激烈竞争下，如不能走出困局，阿里会相当大镬，呢个亦系点解阿里喺低估值下，股价迟迟未能重返红底水平。

至于港股都无乜好讲，国常会结束，但阿爷未有推出任何刺激经济措施，继续打嘴炮，虽然减咗息原意系想松一松银根，却搞到人民币继续走软，A股跟港股噚日都脚软。美国国务卿访华，虽获习大大会见，双方见面后，未有发表任何联合声明，反映双方未有共识，只系关系上打开僵局缺口，但始终你有你讲，我有我做，唔见得美国会停止制裁中国企业。等待好消息嘅投资者失望，又再沽货离场，恒指回试50日线及250日线，成交更缩水至1000亿之下，一句到尾，港股缺水情况，由18000展开反弹都无改善过，挟淡仓亦有停止嘅一日，北水买入又卖出，周一净买入，噚日又净沽出，根本唔会同你坐定定。散户更加系心灰意冷，韭菜被割得多，早已转战美股，甚至其他市场，跟巴菲特买日股都仲有希望，港股早成弃婴，上上落落，有波幅，冇升幅，当早前港股重见二万，古天后已提示反弹浪随时完结，今日一旦再失守最后防线20日线，睇怕新一轮跌浪又再展开。