专访｜伍富桥与富贵老婆新闻台相识印象差：唔系正常女仔 认「亿万驸马」形容贴切
2023-06-09 15:33 
《超级巨声4》出身的伍富桥（Alvin）自从与富家女友梁兆楹（Shirley）结婚后，与 「亿万驸马」之名结下不解缘，尽管流言蜚语充满负评，但伍富桥却未有感到难受：「起码比嗰阵多人认识咗，咁『驸马』呢个字又有女婿嘅意思，对我嚟讲觉得又冇讲错。」在伍富桥的眼中，太太竟然豪气又白痴！
摄影：谭志光 记者：Grace Ho
伍富桥早前趁着两人结婚一周年，推出新歌《很多很多份之一》，日前接受《星岛头条》的访问，谈及夫妇二人相识经过，古语有云「无仇不成父子，无怨不成夫妻」，因为性格累事，令伍富桥在相识初期留有不良印象：「我哋喺娱乐新闻台就认识，佢有交过啲VO畀我录，不过嗰阵我个人冇乜自信，又内敛，成日都避开人哋嘅眼神，更加冇同佢打招呼，所以佢对我嘅印象好差，觉得我冇礼貌！」亦因为两人欠缺交流，伍富桥直言对太太冇印象：「只系记得有个咁嘅同事，直到有朋友带咗佢嚟我嘅健身室，先系真正认识、开始有印象。嗰阵觉得佢比一般女仔man，好豪气，同其他女仔唔同，唔系一个正常女仔。」
【相关阅读】：「亿万驸马」伍富桥情人节又飞喇！富贵老婆孭廿万Hermès搭廉航玩贴地
结果两人一拍即合，伍富桥认定了对方成终身伴侣：「我冇谂过喺印象咁差嘅情况下，最后竟然可以喺埋一齐，仲成为我太太。佢最吸引嘅主要系性格，一来佢系好man，二来有阵时又好白痴，man嘅时候系可能我遇到啲难题，或者我唔开心嘅时候，佢同我分析，会畀到一啲我谂唔到嘅意见，又或者我睇一件事都只会喺一个角度睇，但系佢会教我喺另一个角度睇，甚至有人做咗啲嘢令到我好嬲，咁佢都会讲某程度上我都做咗啲嘢唔啱，所以先会令人咁样做，佢会令到我去反思。」
【点击睇伍富桥照片】：
伍富桥续说：「呢啲点点滴滴，都会令到我成长，变得成熟，可以系呢一世都一齐嘅人。不过佢除咗做正经嘢嘅时候好正常，其他时间都系好白痴，好似前排有个网民留言话我太太个样生得好搞笑，佢睇完之后都喺度狂笑，跟住话自己个样都生得好搞笑，呢啲嘢会令到我觉得佢好得意，所以我更加锺意呢个女仔。」
伍富桥专访｜性格内敛惹人误会
在整个访问上，伍富桥多次感激太太改变他的性格，又感激太太令他的人生更加完整：「可能我系巨蟹座，成日会谂啲无谓嘢，好似对住啲前辈，如果嘻嘻哈哈打招呼，人哋又唔知会点睇我，如果我同人打招呼，万一人哋唔睬我，又会唔会好尴尬，谂吓谂吓不如扮见唔到，所以会有好多误解，以为好寸。」
伍富桥笑言：「而家好多朋友话我嘅性格开朗咗好多，同你讲嘢起码够胆望住你只眼，呢啲以前唔会。我都好响往而家嘅状况，有自己嘅家庭，有另一半，呢样都系好憧憬嘅一样嘢，我本身系一个比较传统嘅人，家庭观念都好重，唔希望太迟先结婚，大家都觉得结婚系要喺最爱嘅时候做，咁样先系最好，所以咪有呢个决定，先结婚、后拍拖。」
伍富桥专访｜不是富二代？
不过入行初期，伍富桥一度被认定是「富二代」，周身名牌且出入揸靓车，但恋上太太后，情况出现了逆转，变成靠老婆的「亿万驸马」。他笑说：「我又未觉得算系负面，又唔觉得唔好，起码比嗰阵多人认识咗，咁驸马呢个字又有女婿嘅意思，对我嚟讲，觉得又冇讲错。其实我只系小康之家，话我系富二代系因为我揸Tesla。我嗰部又唔系百几万嗰啲，其实都只系一架代步嘅车。」
到了现在，伍富桥更加冷待所有流言蜚语：「其实结咗婚，点会分老婆畀定老公，都系大家嘅钱，如果财政独立，不如拍拖喇，我唔会怪外界点样睇同谂，佢哋唔识我本人，唔知道实际情况，所以佢哋点写，睇咗就算。」他还说：「就算逐点澄清，佢哋都会周围去讲，无谓中伏，佢哋只系想辣㷫你啫，如果出PO有人留言 ，我同太太会like但系唔会留言，太太有时都会认同啲网民系咁润我，话系㗎喇，食得咸鱼抵得渴，所以我哋对于网民嘅批评都冇乜嘢，佢哋点讲都好，我哋都会酒照饮，舞照跳，唔会影响到我哋。」
数数伍富桥入行将近10年，可惜机会未算多，佳作亦只昙花一现，曾自觉出现迷惘期而郁郁不得志：「嗰阵会问自己点解冇人留意我，但系我而家睇番所有嘢都系整定，冇得强求，尤其系观众缘，唔系想要就有，而且机遇亦都系，唔系你就唔系你，而家谂得好开，最紧要生活到，有完整嘅家庭，同外父外母生活得开心就得。」
提到外父外母，伍富桥有一丝愧疚：「我哋冇好正面讲啲新闻，佢哋明白有啲系夸张咗，但系我自己有啲愧疚，好似无端端拉咗佢哋承受呢啲压力，会有啲唔开心同亏欠，好彩好佢哋体谅，明白系工作嘅一部份，我每日都有自己嘅工作，有搵钱返屋企，太太本身搵几多，屋企家底有几多，呢啲唔到我控制，总之我有做一个男人、做人老公同做人女婿要做嘅嘢就己经够。」
伍富桥专访｜老婆亲手毁灭包袱
不过凡事有两面睇，抱得美人归固之然开心，伍富桥亦因此看清楚身边人：「冇谂过一啲我以为好好嘅朋友， 好兄弟，知道我发生呢件事，会用估唔到嘅角度去睇我，令到我睇清身边嘅人，边啲先系我真正嘅朋友，边啲系计算紧我嘅人。」他还说：「我又试过同啲好耐冇见嘅朋友食饭，佢哋会话『你仲记得我㗎咩？』， 仲话我『扮猪食老虎扮单纯』，特登埋我老婆身，呢啲系喺好close朋友口中讲出嚟，我唔明点解会咁，如果系真嘅朋友，应该有祝福而唔系踩，除非你觉得佢另一半真系有问题，对人有害咪会讲，如果唔系会祝福佢，令到我上咗一堂。」
而伍富桥太太亦戥老公不值，试过在社交平台出po透露老公被好友误解而郁郁寡欢，更为老公抱不平：「谣言止于智者，你问得出呢个问题，好明显你就系其中一位造谣者。」对于太太的支持，伍富桥在访问亦有说：「发生咗呢啲事，我有话俾佢听，佢系会担心多啲，可能佢成长背景，遇到呢啲事比较多，经验多过我，佢对呢啲嘢冇乜感觉，有阵时仲会安慰返我『你又冇偷有冇抢，又冇做犯法嘢？有冇伤害人？如果冇就唔好理呢啲人，你而家好得闲呀！』」讲起出post，伍富桥笑说：「以前我只系会摆chok同靓仔嘅一面，但系太太反而将啲无厘头嘢摆咗上网 ，点知反应仲好过以前，多咗人会留意，先知有个咁样嘅人，睇最真嘅人，彻底毁灭咗偶像包袱，不过咁样仲好，多谢佢，将我开心一面摆咗出嚟，唔系好难搞！」
【其他文章】：
萌爆Sticker主角肥仔Tatan游内地狂被集邮 10岁大个仔变精灵眼镜男
12个TVB经典舞小姐！周海媚最惊艳靓过《一舞倾城》 温碧霞吊带小背心上阵
一舞倾城丨文凯玲过档狂呻：擘开对髀都冇人要 姚子羚一举动揭穿真实身份
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应