独家丨71岁程可为首公开被灵体索命险死 人生多奇遇遇贼入屋苦心劝收手

71岁的程可为(大姑)，两年前不获TVB包薪续约，入行逾50年已回复自由身的她乐得轻松。约大姑做访问，被她带住穿梭时空，21岁曾遇过令她毛骨悚然的撞鬼经历、51岁独居时被贼仔爬水渠入屋行劫，大姑自言做人行得正企得正所以都能化险为夷，她寄语做人要实际，唔好占人便宜：「欠债个数冇得走系要还嘅，个天会睇住唔会入错户口。几多恐怖命案由爱到唔爱而动杀机，好危险呀。」采访：方骞平 摄影：朱伟彦

相由心生，大姑行得正企得正，愈老愈有福气。

程可为人生好多奇遇。

程可为冇谂过退休。

大姑首度向《星岛头条》公开曾被灵体索命险死经过。

程可为认为靠自己最实际。

「御用阿妈」程可为效忠TVB 50年冇变过心，当年有电视台高薪挖角3次都不为所动，但两年前改签一年一骚，感觉被公司「离弃」，不过明白到近年经济环境差，双方冇对错，目前已放下：「我唔伤心喇，TVB每年仲有一骚搵我，我一定会返去。」

TVB告别作《隐门》，同剧有陈展鹏、黄智雯及卢宛茵。

离开TVB后跟马浚伟、陈秀珠及施匡翘拍港台剧《我们的毕业礼》。

11年前于《女警爱作战》中着低胸装演出，身材超有料。

2003年程可为及郭可盈合作拍过《青出于蓝》。

跟郭羡妮合拍《情越双白线》。

连环恶梦获高人解救

一直循规蹈矩，多年来从未传出负面新闻的大姑有好多奇遇，她首次公开超恐怖撞鬼经历，「50年前仲读紧训练班，当时家住九龙城唐楼，有晚收工喺楼下闸口听到阿妈叫我乳名，之后持续6晚发梦都见同一副棺材，旁边有对男装尖头鞋，然后有把老人家声对我讲『我好锺意你，想你做我老婆！』梦中我就同佢理论话『大家系两个世界嘅人，而且无仇无怨，根本冇可能一齐…』」及后妈咪安排她到附近的诊所睇医生，靠食安眠乐安睡，但10日后停药恶梦再来袭：「嗰次佢仲叫我企上去花架，好彩我仲清醒知道咁样做会跌死，嬲到爆粗。」但当时她已变到有气冇力，失魂落魄，阿妈再次畀钱她去睇医生，去诊所路上竟遇上一位「高人」跟她说：「你我相遇系缘份，睇你个样时日无多好论尽…」并教她返归叫阿妈去一个地方，做一啲帮她保命的方法。说也奇怪，一直唔信她撞鬼的妈妈见她声泪俱下，跪地求救后照「高人」说话去做，自此恶梦消除，不过，求救内容要一世保密。

大姑年轻时经常担任《民间传奇》女主角。

1975年她在《乘风破浪》崭露头角，之后成爲了TVB力捧花旦之一。

大姑(左一)、吕有慧及苏杏璇，大姑称自己唔系靓女，但够端庄。

唔信有一生一世爱情

问到遇上索命灵体是否跟「不婚之谜」有关？大姑唔敢肯定，但就一定跟信任有关：「𠵱家社会变化太大，出面引诱太多，自己都唔敢担保一生一世爱一个人啦，何况要保证对方爱你？做人实际啲好，一定要靠自己，唔好占人便宜，几多恐怖命案由爱到唔爱而动杀机，好危险，唔好玩呢个游戏。」

大姑识饮识食，畀得起钱享受人生，但否认系隐型富婆。

大姑、冯素波、马海伦、于洋都系受欢迎绿叶。

享受人生。

约朋友叹吓下午茶。

经常去食好西。

唔会强求，有得做咪做。

劝贼仔勿再挺而走险

另外，大姑又于31年前试过家中遇劫：「嗰晚个贼等我瞓咗先爬入屋，入房拍醒我，我装作镇定摸黑行去客厅畀咗7万几现钱佢，直觉觉得佢对数字几满意，感觉佢唔会伤害我，对方赞我镇定仲要求同我倾偈，我就劝佢回乡做啲小生意，唔好再挺而走险，仲打开大门畀佢离开，佢坚持喺边度嚟就喺边度走，我喺房睇住佢爬渠九秒九落返地下，好惊险，事后我都冇报警，但吓到对脚系咁震。」大姑冇打算退休，现阶段好享受人生：「我畀得起钱食嘢及揼骨，想开工又有人肯搵我，我好满足㗎嘞。」
 

《星岛头条》APP经已推出最新版本，请立即更新，浏览更精彩内容：http://www.stheadline.com/