古天后日志｜港股少做少错 唔做唔错

5月22日，天气炎热，部份时间有阳光，稍后有几阵骤雨。上周五美股由升转跌，主要系有关债务上限谈判再度陷入僵局，三大指数报跌收市。道指跌109点；标指跌6点；纳指跌30点。纳指升至12800阻力，首日开出阴烛，而标指亦踏入4200-4300阻力区，同样开出阴烛。

虽然债务上限谈判再陷僵局，不过每次债务上限谈判亦如此，唔到最后限期，谈判双方都绝不退让，即系喺6月1日限期前，双方仍会摆出唔妥协嘅姿态，但到死线两党最终都会达成协议，唔会畀债务违约呢件事发生。除咗美债上限谈判外，上周五鲍爷发言时，总算唔再放鹰，暗示6月偏向唔再加息，鲍爷金口一开，6月加息机会由35%降至10%，10年债息升至3.72%后回落。预期美息见咗个顶，但通胀核心数据未见大大回落，6月后核心CPI更有机会回升，要留意本周五公布嘅4月PCE数据表现。

市场对于美国经济陷入衰退与否有不同意见，过往美国多年QE放水，令全球资金滥泛，热钱太多。虽然去年美国开始加息收水，但市场仍然充斥大量高息产品，加息亦无法令热钱从市场流回银行体系之内，间接令联储局嘅货币政策未能有效地控制市场资金流向。

A股经过第一季阿爷大力放水后，3月份出现超大额借贷，3月嘅经济数据略见起色，无奈到4月份数据又回复弱势。而1月及3月阿爷放水，资金流入A股，当时成交额亦增加至逾万亿元。但当4月份嘅经济数据不似预期，之前涌入A股嘅资金，喺5月趁A股上咗高位开始套现离场，最近A股成交亦从月初过万亿元，减至8500亿元左右。上证指数高冲3400后回落，创指反弹目前险守2200，反映炒A股嘅资金陆续离场，而非持续买入。

至于港股仍然系一场闷局，近呢半个月恒指喺19300至20300之间千点上落，但成交维持薄弱，指数即使喺二万水平楼下，仍未见资金喺低位入场，资金只系喺唔同板块之间轮动短炒，高位有资金乘机走货，尤其当几只重磅科网股，业绩前后炒上，升势都系昙花一现，其后都系派发，博业绩嘅全部沦为韭菜又被割。港股目前嘅状况，系少做少错，唔做唔错，呢个亦系港股成交一直淡静嘅原因。