机会，总是留给有准备的人。
杨伟伦（阿卵）与麦沛东（麦东），为电影《正义回廊》的角色，分别准备了十三年及六年，才等到一鸣惊人的机会。电影叫好叫座，更荣获本届香港电影金像奖十六项提名，而两位男主角，则同时角逐「影帝」。
四十岁的杨伟伦坦言：「我冇估到自己有份提名，因为今年好多戏，又好多劲嘅演员，我觉得麦东会有嘅（提名），但我就抆啲，因为我哋同一部戏⋯⋯但一齐提名，真系好神奇！」
三十三岁的麦沛东就表示：「谢票嘅时候都有讲，如果我哋可以一齐提名『男主角』，喺同一个格入面，其实真系好梦幻！」

二人一同提名，感觉依然梦幻，他们一唱一和，麦沛东一句：「我喺演艺学院读书嘅时候，真系冇谂过自己可以同黄秋生、刘青云，竞逐同一个奖项，发梦都冇谂过可以行红地毡。」
杨伟伦即笑谑：「自己买就得，啲红地毡，浴室前面嗰张。」麦沛东接话：「我屋企嗰张灰色嘅。」
撇除赛果，败给刘青云的二人，其实有提名已当赢咗，换上认真Mode，杨伟伦称：「我做演员，唔系发明星梦，系纯粹因为觉得好玩，好玩嘅地方系，我好似有一个空间，投入去另一个世界咁，好过瘾。」
除了好玩，麦沛东称：「好多人第一次睇我嘅演出，就系《正义回廊》，所以多咗机会同知名度，对我嚟讲，系一个起步。」
他们解锁的，不只是一同提名的成就，还有继续追梦的空间。

第一次

《正义回廊》是杨伟伦和麦沛东第一次担正的电影，二人凭演出，一同获提名角逐今届香港电影金像奖「最佳男主角」，虽然结果败予《神探大战》的刘青云，但二人反而大谈跟这位前辈的合作。
杨伟伦笑言：「啱啱我仲同青云哥做紧戏，真系冇谂过可以同佢竞逐同一个奖，好神奇！」麦沛东则满脸「葡萄」：「羡慕你罗！我都同佢（青云）拍过，但系佢拍完先至到我，我净系可以同佢影张相，冇得同佢拍⋯⋯之前好似话，佢访问赞我呀，好开心！」
他们担演的《正义回廊》改编自真人真事，二人分别饰演弑父杀母的逆子，及看似智力稍低的帮凶，角色充满挑战性，令两位科班出身的演员，投入以外，也被角色影响。
杨伟伦表示：「拍嘅时候，系有啲影响嘅，因为个角色谂嘢、做人嘅方向好Sad，令我喺嗰段时间 有一种低沉嘅心情。
「但系我又冇谂点样去抽离，因为我哋知道自己系工作紧，拍完又会做其他工作，投入另一个世界。而我同麦东本身都系比较Positive嘅，所以角色冇想像中影响咁大。」
麦沛东回答前，冷不防阿卵一句：「佢智力真系降低咗。」他一笑接话：「o依家日子耐咗，提升番。」
为部戏，他特别增了四十磅，所以他坦言：「当时我对食物系冇乜欲望，一得闲我就食，瞓觉前又啪雪糕又饮可乐，基本上冇停过，仲辛苦过减肥。」