古天后日志｜直播概念炒作见唔对路要识跳车

3月9日，大致天晴，局部地区能见度较低，日间天气温暖。隔晚美股个别发展，系道指跌咗58点，标指跟纳指都见反弹，标指暂时守住3900，市场似乎已消化早一晚鲍爷嘅鹰派言论，即使隔晚公布嘅小非农强过预期，市场反映都唔算太大，等埋星期五嘅大非农公布，再睇美股会有乜嘢反应。

周三小非农就业人数达24万人，反映就业市场仍然强劲，其中酒店业增加8.3万人，金融服务就业人数增加6.2万人，制造业亦增加4.3万，商业服务增3.6万人，反观运输业表现较差，经过1月份强劲增长后只增长3000人。数字反映服务需求正在增加，似乎招聘出现困难，令到薪金年增长率保持在7%以上，短期睇唔到上升趋势有变化。就业市场强劲，正好支持联储局继续行紧缩货币政策，鲍爷放鹰亦变得合理。

鲍爷喺前晚放鹰，表示息口高位将较预期高，市场开始推算3月议息或加息0.5%，但隔晚被问及几时停止加息，又未见佢斩钉截铁畀到个肯定答案，同时亦透露3月加息幅度并未有定案。呢啲举动，难免令人觉得联储局喺度出口术，打压市场炒作商品市场，以压止通胀因为资源价格上升而继续走强。除咗周五有大农数字，下周亦会公布2月CPI，一旦出嚟嘅结果反映通胀继续回落，唔排除市场对息口走势睇法再度逆转。值得留意系九成标指企业已派成绩表，表现唔算差，全年盈利可望保持增长，明年盈利增长有望进一步提升。而今年美股回购金额可望提升至1万亿美元新高，呢啲购买力都系支持美股推升股价嘅动力，呢个亦系古天后对美股唔会睇得太淡嘅原因之一。

港股呢个星期走势逆转，再度回复弱势，资金集中炒作直播带货股份，单系电视广播(00511)两三日间股价已急升两倍有突，噚日就连香港科技探索(01137)都因为炒直播带货急升。其实直播带货系咪可以为公司带嚟巨额收入，大家心中有数，只要睇返两年前上市热炒嘅快手(01024)，当年亦系热炒直播带货概念，股价一度高见400元水平，但股价由当年高位累跌超过八成，若然直播带货真系咁好执，快手股价又点会落得如此下场，概念炒作只属一时，市场最终都要回归理性，内地直播平台多如天上繁星，电视广播如何面对咁多竞争，炒作嘅嘢见好要收，参与其中见唔对路最紧要识跳车。