古天后日志｜大市见二万一急转弯反弹或告一段落

3月8日，大致天晴，日间温暖，晚上能见度较低。美股隔晚显著下跌，由开波跌到收市，三大指数跌逾1%。美股隔晚下跌，主要系鲍爷又出嚟放鹰，表示息口顶部可能高过之前预期，即系5.25%未必系息口高位，债息应声而上，油价跟资源价格下跌，鲍爷放鹰令油价急跌，正好打压令通胀持续高企嘅油价及资源价格。美国通胀究竟系维持高企，抑或能够见顶回落，暂时仍属未知数，联储局刻意放鹰，目的当然系为咗压抑通胀，嚟紧呢两日会公布大小非农，睇下非农数字对通胀预期有冇启示。

美国嘅通胀系由疫情所引发，主要系过去两年供应链出现问题，导至物资供应短缺，但全球开始走出疫情，供应链亦逐步回复正常，正路通胀理应见顶回落。虽然供应链问题得到解决，但劳动成本上涨问题却未解决，疫情后美国因病而消失嘅劳工人口估计高达350万人，加上唔少人疫后唔愿意再做长工，转做freelancer及网上创业人数不断增加，呢啲劳动力唔再轻易回到原本工作岗位，美国高待业职位及高工资增长，均反映就业市场及劳工成本嘅严重性，亦系令通胀出现不稳定性嘅最主要因素。

港股噚日走势相当难睇，早段喺两个记招期间，一度急升至21000水平，一举冲破20日及50日线，岂料午后急转直下，最终更倒跌收市。至夜期跟ADR港股进一步随美股回落，10日线岌岌可危，预期今日有机会考验10日线，一旦10日线失守，由上月低位展开嘅反弹就玩完，有机会再下试19600-19800寻找支持，尤其系20000点有重牛区，唔排除噚日杀完21000嘅重熊，呢两日就下试20000杀重牛，大户实行上下其手，3月唔会好似1月及2月咁行单边，将会反覆上落，一唔小心跟错边，好容易左一巴，右一巴，呢啲时候，都系少做少错。