古天后日志｜大户力压2月期指于低位结算

2月24日，天晴，天气乾燥，日间天气温暖，晚上天气转凉，今晚要夜归就记得著多件衫。美股维持反覆上落局面，标指守住3900支持，目前仍然系3900至4100之间上落，早段美股疲弱，收市前扭转跌势，三大指数收升，

由于反映通胀嘅数据回落速度不似预期，市场本来高涨气氛难免受影响，不过息口喺5至5.5%见顶机会甚高，只系今年下半年减息机会不大，反而FOMC已预算明年先有机会减息1%，2025年再减多1%。至于油价及资源价格虽见回升，但升幅可控，未至对通胀带嚟太大助力。反而工资增幅对通胀威胁更大，虽然工资增幅由去年8%回至约5%水平，不过美国就业市场仍强劲，首次申领失业救济人数不足20万，劳动力较为紧张，令工资仍有一定增长幅度。

踏入业绩期，唔少重磅股已开始派成绩表，虽然大部份嘅业绩均见倒退，但以去年内地受疫情影响下严厉封城，大部份企业业绩受影响亦系意料中事，主要系睇返今年嘅业务有冇条件复苏，所以去年嘅业绩麻麻已变得唔重要。对于企业今年回复增长，答案大部份系正面嘅，而集团有否回购计划，亦系另一个吸引市场关注嘅原因。不过即使有回购计划，股价亦未必一定升，好似百度(09888)已公布50亿美元回购计划，但公司早前公布大搞AI，要做ChatGPT，然而内地则刚刚宣布唔容许内地网民用ChatGPT，至于原因你懂的，预计今日股价会受压。暂时百度支持位喺130左右，若然因为AI概念而买入咗百度，留意130元不容有失，若然失守，都要严守止蚀，唔可以盲目期待。

港股整个2月处于调整浪中，1月大市见高位22700水平左右，但该水平刚好系过去一年四次反弹浪顶，未能攻破回调亦合理。同时港元喺1月中左右见有资金再度流出，人民币汇价兑美元亦回落至6.91水平，外资流入A股亦未见积极。喺资金面转弱下，市场气氛自然受损。不过经过足足一个月调整，大市接近二万水平，又重新出现吸引力，至于古天后都系集中返ATMJ、港交所(00388)等重磅指数股，一旦大市完成调整，呢啲股份将会率先反弹。