古天后日志｜大市调整未完成 仍有机继续回补20200裂口

2月14日，大致多云，初时有一两阵雨，天气显著转凉，最低气温15度，明日温度会进一步下降。隔晚美股喺公布CPI前做好，三大指数上升，升幅超过1%，至于标指仍守4100水平，目前喺4100-4300之间上落，美股仍然喺高位震荡。美股业绩期已步入尾声，至今大部份美企第四季盈利增长轻微倒退，跟预期稍有落差，但美股却不跌反升，似乎市场资金仍憧憬下半年有机会进入减息期，愿意逢低买进美股，令美股高居不下。即使美股现价已较低位反弹唔少，但标指唔少股份仍较去年高位回落三成至五成，美股只要出现调整，资金仍愿意入场。至于今晚布CPI，只要唔系太偏离预期，美股亦未必有太大变化，只系隔晚已升定先，今晚就算CPI啱市场心水，都未必有本事再大升。

至于港股噚日回落至20800水平后反弹，较高位回吐1900点，并回补1月4日上升裂口，只系回补首个裂口后反弹，成交未见配合回升，只有1120亿元，反映资金喺现水平未见积极部署，港股仍有机会继续调整，再回补1月3日再对上一个裂口20200。港股喺1月份升破20000点再上23000水平，平均成交额每日都有1500亿以上，令1月有足够动力再升3000点。但进入2月情况明显唔同，除咗喺23000水平已无法继续突破，成交亦开始萎缩，大市步入调整。即使噚日大市回补首个裂口反弹，成交未见明显上升，即系回调或未完成，未有新资金进场，耐心等候大市继续回补下个裂口20200，届时买货或者可以进取少少。虽然港股重返250日线之上，已成功走出熊市步入牛市，但牛市一期基本系一个较长嘅收集期，大市或喺某区期内上落，今年并非大牛市，表现或较反覆，吼回调低位买货，亦唔代表可以坐定定，见升至阻力位要识食糊，炒上落方为上策。