独家丨林敏骢 江美仪 罗毓仪祝人人有得捞 《下流》成大赢家「车家」食开年饭庆功

今年TVB台庆奖项尘埃落定，「视帝」、「视后」落喺陈山聪及江美仪手上。首拍剧集的林敏骢(大师)，亦被网民封为「民选视帝」赢尽口碑。新正头「车总」林敏骢率「车太」江美仪及细女「蔓蔓」罗毓仪豪食开年饭庆功，男方接受《头条日报》访问时就笑言一早攞咗「奖金」(优厚酬劳)，更抵死自爆酬劳较易角前的姜皓文还要多。采访：方骞平 摄影：谭志光 场地：中华小馆

江美仪、林敏骢、罗毓仪齐齐「捞粗」，期望新一年搵多啲。

新一年大家都要开心到爆。

「车总」及「车太」今年会畀大利是「车蔓蔓」。

去年TVB剧集《下流上车族》叫好叫座，成为台庆颁奖礼大赢家，更以大热姿态擸埋「最佳剧集」大奖。林敏骢、江美仪及罗毓仪于开年饭局中劲好胃口，开心大啖食「凤凰展翅」(炸小黄鱼)、「年年有馀」(镇南非鲍鱼) 、「包你捞起」(猪筋捞粗面)及冰镇咕噜肉等，笑言大女「芊芊」郭柏妍要开工，要食埋佢嗰份。「捞起」时3人大讲吉利说话，林敏骢边落鲍鱼汁边说：「呢个系Easy执！」江美仪及罗毓仪你一句我一句开心说：「个个有得捞，仲要系捞粗，(落花椒油)有好多油水，搵千千万万亿亿然后上车喇…。」

林敏骢率美仪、罗毓仪食美味丰富开年饭，喺新一年一定要丰衣足食。

要捞到风生水起。

26岁童颜罗毓仪愈嚟愈红，最近更成为星梦娱乐歌手。

「车太」江美仪爆跟「车总」林敏骢八字好夹，两人能互相助攻。

林敏骢取笑细女「蔓蔓」罗毓仪行紧狗屎运，半年间人气急升仲唱埋歌。

美仪同前夫互相关心

江美仪等咗31年终夺视后，老友梁洛施、前夫吴君祥分别发短讯祝贺，美仪承认跟前夫仍保持良好关系，会互相关心，问到有否复合机会？美仪即笑住落闸：「唔好喇啩！畀啲真嘢我嗒吓好唔好？」罗毓仪话「妈咪」行紧正官运，有奖有事业就有老公。江美仪坦言有个伴都好，开心就得，一切随缘：「不过，我同林敏骢八字系好相似，会互相助攻！」林敏骢表示同意：「佢开工第2日拍感情戏就助攻我，所以要投桃报李，𠵱家佢由『助攻王』变『乌鸡视后』。」

前夫吴君祥透过微博恭喜江美仪得奖，美仪忙到冇即时发现。

梁洛施在IG上载绕实出炉视后江美仪的合照

最想《下流》拍电影版
林敏骢边食边爆料：「所以我当日同佢(美仪)讲，话『视后一定系你』，但佢唔信！」问到大师系咪早已收到风？他哈哈大笑推说：「因为有人报梦畀我知。」大师再得戚搞烂gag取笑江美仪：「佢拍剧前又紧张，颁奖礼前仲腾鸡到去药房买视后(事后)丸，话对手好劲，食伟哥㗎，要顶住！」大师又再爆多啲：「今次系老窦赚钱老婆同女享福，我系总经理(曾志伟)辈负责派奖，帮佢哋打江山，哈…我连民选视帝都唔要喇，因为攞咗个终极大奖，喺台上俾团队围住经已好满足，连监制都要弹埋一边。」他又指自己已攞咗『奖金』：「『奖金』唔系差电影好多，志伟仲话我比黑仔(姜皓文)多，我睇钱份上啫。」美仪和应说：「佢攞晒啲『奖金』，所以视『奖品』如浮云，『奖品』系好虚啫。」

林敏骢及「乌鸡视后」主演嘅《下流》获「最佳剧集」大奖，大师台上致词时一脸满足。

《下流上车族》叫好叫座，成为台庆颁奖礼大赢家。

而罗毓仪最想由「爹哋」执导拍《下流》电影版《如珠如宝千千万万》，美仪建议叫《车家大战哈比族》都唔错。另外，林敏骢将于3月举行作品展演唱会，「车家」到时会于台上合体一齐唱歌。

林敏骢、江美仪、郭柏妍、罗毓仪合作愉快，美仪大赞两女好乖，承诺会畀佢哋大利是。

当晚宣布视帝得主时，候选人林敏骢竟坐喺台下嘉宾席，原来系有玄机。

大师今年再搞作品展，而喺2017年嘅演唱会中曾邀请苟芸慧做嘉宾。

罗毓仪凭住一脸童颜成为TVB「御用学生妹」，有好多男粉丝。

男友Mike被指跟林敏骢撞样，罗毓仪死都话两人唔似样。

夺得「飞跃进步女艺员」嘅「芊芊」郭柏妍唔止有演戏潜质仲系学霸，高挑身材都唔差。

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ