你旧日的梦想是甚么？实现了吗？
喜剧巨匠詹瑞文（现改名：昊宸），于其新搞作沉浸式美食剧场中，向观众收集「旧日的梦想」，梦想跟食一样，缺一不可。
那詹瑞文呢？
「我一直实践紧旧日的梦想，就系演艺、表演、戏剧创作同舞台。捱苦头唔紧要，因为每一个梦想，实践嘅过程中，都要经过考验，就要睇自己系咪忠于自己。」
一切由戏剧出发，只因：「要实现我嘅梦想，就要聆听自己嘅心，都要分阶段嘅，第一阶段梗系做演员，做做吓，我知道自己锺意做喜剧，慢慢又想自己创作、建立自己嘅剧团。
「因为我想多啲人睇到我嘅戏，我就将自己嘅戏，写得更大众化⋯⋯讲吓讲吓，就系我呢三十年追梦嘅过程。」
一晃眼三十载，五十七岁的詹瑞文，逐步追梦，时至今天还有梦想需要捕捉，所以每一天也是蓝天。

二十年下来，詹瑞文继续相信直觉，把于欧洲流行已久的沉浸式餐饮剧场，引进香港，于铜锣湾起步，由筹备到实践，只花了半年时间。

人做我唔做

有梦想，除了不用做咸鱼，也需要一定程度的付出，当付出跟所获不成正比，难免会令人气馁，詹瑞文也面对过这些情况。
「会攰、会沮丧，但系我冇谂过要放弃。我成日觉得，样样都有得做，只系有啲嘢我做过，就唔想重复，好似〇三年，我获邀喺日本国立剧院演出，演出完我发现，日本人唔识我嘅语言，都锺意我嘅演出，我就觉得，戏剧需要普及化。
「于是我就成立自己嘅剧团，自己做想做嘅事，最重要系相信自己嘅直觉，做一啲领先嘅项目。」
二十年下来，他继续相信直觉，把于欧洲流行已久的沉浸式餐饮剧场，引进香港，于铜锣湾起步，由筹备到实践，只花了半年时间。
「我喺六个月前有呢个新嘅梦想，四个月前就遇上餐厅老板，一拍即合。由戏剧出发，到餐单、菜名都融入剧情。有啲人问：『哗！詹Sir乜你连餐Show都捞埋？会唔会开酒廊、夜总会呀？』佢哋以为我系安排歌手上台唱歌。
「我解释番我唔系做呢啲，如果我继续发展，我会想起一间餐厅，专系为咗演出嚟做，今次我哋好多设计，都要就住已有嘅餐厅嚟做，有专用嘅地方嘅话，就做得更加好。」

为了把舞台剧普及化，他于〇五年开始演出独脚戏《男人之虎》，至一六年的《新男人之虎 笑完武士》。

他的另一撒手鐧，是反串演出，除了喜剧效果，「其实都系一种表演艺术。」

 

戏剧产业化

筹备之时，适逢疫情第五波，但詹瑞文还是信心爆棚。「我从来都系咁，我嘅直觉系，冇人做过就系得，香港人好接受新事物，又重视生活、重视精神食粮，所以一定会试新嘢。
「以前冇一个人做嘅戏剧，除咗栋笃笑，我就做《男人之虎》，一个人分饰多个角色，慢慢做到长寿商业剧场，将戏剧产业化，令更多人都睇到。」
戏剧路一走便三十年，詹瑞文笑言，最重视健康，「做一个演员，一定要健康！身体、心理、精神同灵魂，一样要健康！所以我有少少唔妥，就会尽快处理。
「最近我做咗一个食物敏感嘅Test，医生话，我身体入面有只菌好吸甜，所以我好锺意食甜嘢，但系食得甜或吃某一只肉多，又会令我身体发霉，哈哈哈！所以我要排霉，食得清淡啲，减紧啲霉菌再食。」

近年他积极培训演艺新血，也是其比较新近的梦想。