独家丨骆振伟甜住任丹麦太太闹垃圾《绳角》霸气「袁天就」原来系宠妻狂魔

2022-12-23 07:00

38岁骆振伟（Thor）最近凭ViuTV剧《绳角》大师兄「袁天就」弹起，角色惨死一幕更搞喊不少观众，33岁丹麦籍太太Katrine Friis Olsen当然唔例外，Thor希望透过角色好成绩，实现多年演员梦。不过剧中霸气的Thor，现实却是「宠妻狂魔」，两夫妻接受《星岛头条》访问分享丹麦过圣诞节情况时，Thor任Katrine用超流利广东话闹「垃圾」外，平日相处更加是Thor让步居多，不过拥有开心果性格的Katrine，确实有抵锡一面，大家想知就要睇落去，但小心闪到盲！采访：杜杜摄影：罗安强服装:COS场地:Studio Meta

锡老婆的Thor，知道丹麦人最重视圣诞节，所以由拍拖开始，每年会陪Katrine返老家，但婚后因疫情被迫留港庆祝，不过Katrine赞香港一样好有气氛，而这天拍摄场景同她丹麦的家有几分似。

Katrine将圣诞装饰挂在Thor耳仔，他完全没反抗。

Thor畀Katrine用假礼物笠头，一样冇投诉。

两夫妻在充满圣诞气氛环境影相时，已睇得出Thor有几锡Katrine，Thor全程任Katrine舞，挂圣诞装饰上耳仔，假礼物笠头乜都肯制，最搞笑自称「老虎乸」的Katrine，认为Thor摆甫士唔掂，会闹老公「垃圾」，而气氛却相当欢乐。Thor承认对住老婆冇晒啲有型同潇洒，「嗰啲假象嚟，死啦！我平时都冇留意我喺幕前形象系乜嘢，个剧就梗系霸气，对住佢会细心啲，佢一齐做访问会紧张过佢，会惊佢唔enjoy。」

Katrine指导下的甫士一。

Katrine指导下的甫士二。

Katrine话Thor系「垃圾」唔识摆甫士，之后更即向老公示范。

包办家务屋企得张梳化

得老公爱锡的Katrine亦好鬼识做，问Thor系咪好老公？她识做答：「梗系啦！」Thor唔知好嬲定好笑话：「你睇呢啲佢就学足我。」但好快Katrine露出真面目，「你听我嘅声，梗系啦！哈哈！」搞完笑她即补飞，「佢好好，佢真系好好！（10满分畀几多分？）10个（分）！我真系好好彩，我好少讲畀佢听！」Thor冧笑话：「佢真系好识捞，不过佢知我锡佢嘅。」

Katrine丹麦的家布置果然同场景似样，Thor话丹麦过圣诞主要留在家，一家人好温馨度过。

丹麦圣诞节除了食丹麦曲奇外，大餐主菜有烤鸭和烤猪腩，还有用米做的传统甜品。

Thor有几锡老婆，睇做家务就知，Katrine话：「佢洗碗，用吸尘机，梗系啦！如果佢唔洗碗，我唔会畀佢10，畀7（分）。」Thor解释：「家务我做多，而全部美学都系交畀老婆，我系得一张梳化。」两人婚后Thor知Katrine爱整齐，但Thor又好需要个可整乱的空间，于是申请梳化位属他管辖范围，「佢一入侵我就会响警钟，但梳化之外其他全部佢，我咪得十分一罗！但系佢布置嘢真系好叻，每个嚟过我屋企嘅朋友都话好鬼靓。」Katrine亦笑话：「梳化同埋车系佢嘅，我喺屋企梳化嗰度系唔望嘅。」

Katrine丹麦屋企在郊区，Thor最爱食到饱饱跟她去附近散步。

世界太乱唔打算生BB

Katrine有学茶道、太极同气功，最爱香港食物是皮蛋瘦肉粥同牛筋，虽然她讲明锺意中国文化，并非因嫁了Thor，但受老公影响广东话愈来愈好，除适当时候闹Thor「垃圾」外，要她示范粗口，即爆句最烂的「X你老母臭X」，又话自己系「老虎乸，佢系我嘅门口狗」，笑爆全场。Thor解释教讲粗口，是怕她被其他人闹都唔知，亦希望老婆更认识本土文化。不过Katrine却爆出笑料，「有次我同佢爹哋妈咪喺酒店食晚饭，佢都有去但要走先，跟住佢妈咪问我有啲嘢，我唔识，我讲『咩料呀』，哈哈！佢妈咪话『吓！边个教你咩料』，我话『对唔住妈咪，呢个真系你个仔教』。」

Katrine爆粗时，Thor流露满足笑容，仲话：「佢讲粗口系笑住讲你嬲唔落」。

Thor笑话妈咪跟太太婆媳关系好好，「因为闹嗰啲佢又听唔明，哈哈！」Katrine即闹：「垃圾！」Thor认真话：「我阿妈系个好开明嘅人，我哥哥太太系日本人，我哋好似个国际家庭。」两人已结婚3年，有冇计划生BB呢？Katrine话暂时未有计划，「𠵱家世界太乱，谂吓先，我哋两个冇所谓，有又OK，冇都OK嘅，我哋真系唔介意咁样，同埋我哋愈嚟愈忙。」Thor补充，「我哋成日会讨论，生咗小朋友个life change会好大，唔知会唔会handle到，好似好多嘢烦，我哋未锺意小朋友到一定要生。」

Thor最开心Katrine跟一家人都相处融洽。

被负评所伤靠太太安慰

讲到「袁天就」死一幕回响极大，Thor都估唔到收到不少留言鼓励，「最开心留言系『本身睇《Chill Club》唔锺意你，但我锺意袁天就』，作为演员最想做到嘅嘢，演绎个角色令到观众投入，系好神奇同好梦幻。」Katrine当然都有支持，「我都有睇，都有喊呀！死咗嗰阵时，我好搞笑，睇我老公做啲character，都feel到系我老公，但第一次觉得呢个系『袁天就』，好唔同佢唔系我老公，真系『袁天就』。」Thor希望藉着这次成绩创造更多演出机会，「希望多啲圈内人见到留意到，如果有啱角色就搵我，对我嚟讲好足够。」

Thor为演好「袁天就」，只花了不足3个月操肌和学拳。

「袁天就」最终死在擂台，令不少观众喊餐死。

Thor现在事业渐上轨道，但回想由主持《Chill Club》到推出歌曲《成熟．不了》，经历过不少网络攻击，一路令他很迷失，「直情话讨厌我呢个人，呢个主持做咩啫！讲咩最后六个字啫！所有嘢都可以挑剔，𠵱家网络劲到，佢唔锺意骆振伟呢个人就要全世界认同，佢会搵到佢fans，我知由细到大都唔系个人见人爱嘅人，但当你听到呢个comment都可以好伤。」好彩低潮时有太太呵返，「做幕前好多不安，好担心，我就呻，佢好识得安慰我，佢系好正面嘅人，佢同我好唔同，我偏向负面啲，佢系好叻畀到一啲正能量我。」