独家丨梁祖尧难忘同镜仔拍拳赛戏拍到喊「镜粉」恳求拍《调教你MIRROR 2》

2022-11-16 07:00

46岁梁祖尧(祖祖)处男下海拍摄ViuTV新剧《绳角》，接拍全因角色正、拍摄场地近屋企，同埋可以同MIRROR好兄弟杨乐文(Lokman)、江𤒹生(AK)、王智德(Alton)及邱傲然(Tiger)合作。祖祖激赞镜仔表演专业，不少拳赛场口打到口水汗水齐飞，更试过拍到喊。对于已复工的MIRROR，亦师亦友的祖祖鼓励他们要振作：「点都会畀人话，我谂由得佢(严重事故)共存，总有一日会好嘅。」采访：方骞平

首次正式拍剧的梁祖尧好惊青，最怕跟唔上节奏阻人收工。

祖祖形容拍《绳角》戏里戏外都好热血。

接拍新剧《绳角》全因角色正、拍摄场地近屋企，同埋可以同MIRROR好兄弟合作。

首次正式拍剧的梁祖尧坦言拍《绳角》是一次开心的体验。

戏中AK都「食」过祖祖拳。

首次正式拍剧的梁祖尧坦言拍《绳角》是一次开心的体验，剧中他饰演Cool爆的拳馆教练，因为念旧，永远著住旧拍挡送嘅风褛，又唔使化妆、整头发，开工又近屋企；唯一最唔惯经常要等，又惊跟唔上节奏阻人收工，好彩有好友同场，会拉住AK讲戏，大家都熟唔使怕影响对方休息。

梁祖尧演一位Cool爆嘅拳馆教练，系喜剧演员最想挑战嘅范畴。

祖祖大赞一班饰演拳手嘅演员唔锡身，落力演出。

祖祖跟AK喺剧中有大量感动位，赚人热泪。

镜仔通宵拍拳赛冻到震

祖祖形容戏里戏外都好热血：「戏内我做陪打员，会揸拳靶，训练时要打佢哋，为求逼真，AK都『食』过我拳，而佢哋拍拳赛时就互『食』，见住佢哋一捶捶打落去，连口水、头发汗水都飞埋出嚟，佢哋好唔锡身相当专业，效果好好睇。」祖祖不忘大赞镜仔，用100%力度做好件事，所以成功有原因。而他最难忘有几晚通宵喺观塘码头，冒雨拍生死决斗式拳赛戏，「因为佢哋减肥减到好少体脂，拍摄期间冻到震，加埋伤感情节，睇playback时大家都感动到流晒泪，我好荣幸人生第一套参与咁嘅剧。」祖祖坦言拍出戏瘾，有意将执导嘅舞台剧《通菜街丧尸战》、《隔离童话集》改编成电视剧，最好由原班人马赵祥诚（Ben）、赵学而及陈凯咏等演出。

拍摄通宵拳赛戏晚上，赤祼上身嘅镜仔冻到震。

大家都百份百投入演好套戏。

祖祖有意将舞台剧作《隔离童话集》改编拍成电视剧。

提到休团两个月的MIRROR已复工，祖祖坦言12子在事故中的感受，外人永远唔会明白，所以寄语他们只要团结必会过到，「难过总会过，正如我喺船上望向企喺码头嘅人，见个人愈嚟愈细，但唔等于愈嚟愈唔重要，嗰个人只系变成一粒一点，好似种子咁放喺个心陪住你，系时间拉远咗距离，唔代表淡咗，我希望佢哋可以振作面对之后嘅路。」

MIRROR 11子于巨星篮球赛后接受传媒访问时，教主一度泪眼有泪光。

MIRROR第4场红馆Show发生严重事故，休团两个月后已复工。

当晚梁祖尧对MIRROR红馆事故表现震惊，更发文集气祈祷。

不便回应事故调查报告

意外带出后遗症，祖祖明白MIRROR调整心态唔容易：「究竟佢哋用乜心态去面对工作呢？系咪出嚟带住伤痛呢？定将伤悲放埋一边，可以嘻嘻哈哈出嚟呢？我谂由得佢一齐共存罗，点都会畀人话，总会有一日会好嘅。」祖祖最近收到好多镜粉DM，要求再做《调教你MIRROR 2》，不过他自言唔系心理医生，唔太适合去做：「或者咁讲，佢哋需要我，我点都会喺度！」问到可会担心意外事件影响镜仔发展？祖祖就话担心唔嚟，因为冇得预测，唯一成件事需要好好交代，避免事故再发生，就连舞台剧界都震惊。对于事故报告出炉，祖祖就冇具体回应，只说：「已进入司法程序，任何人唔了解细节都唔应该回应，但情感上我会关心每位伤者，特别系最严重嘅阿Mo，希望佢身边家人、朋友、女友都可以坚强起嚟，面对难过嘅时刻。」