古天后日志｜唔愿承担长假风险 圣诞假后再作定夺

12月22日，天晴，天气非常乾燥，早晚相清凉。美股隔晚反弹，多得Nike跟Fedex业绩好过预期，道指升526点，标指跟纳指分别升56点及162点，标指再度逼近3900，即系之前3900-4100区间整固底部，估计圣诞节假期前，标指会喺3900水平争持。Nike业绩好过预期，反映美国零售市道无之前预期咁差，至于Fedex业绩就反映公司已捱过最差嘅时间，只系两股高开后，未见有资金高位再追货，暂时美股投资者只愿意低位吸纳，而高位追货免问，亦说明标指喺3900水平之上，值博率已大减。

虽然美国于年中开始出现裁员潮，但喺刚公布嘅业绩反映，裁员潮并未影响零售市道，美国业务收入增长仍然强劲，即使中国业务增长放缓3%，但整体计算今次收入仍录得17%增长嘅骄人成绩，去库存未有拖累盈利下跌。Nike嘅业绩说明咗，美国就业市场唔系差，大企业裁员嘅同时，仍有逾千万个就业职位等住用人。而从美国银行股嘅业绩亦反映，裁员潮下，银行坏帐未见大幅长升，而美国GDP喺今年首两季出现衰退后，第三季已回复增长，预期第四季可保持增长，只系增长速度有否回升。市场一直担心美国经济衰退，其实所谓衰退已喺今年上半年出现，并于下半年渐渐回复，来年只不就业市场保持平稳，通胀受控，美国经济陷入衰退机会唔大。

港股成交缩到乜嘢咁，预咗圣诞节长假，市况更趋淡静，呢两日大市回调至19000附近支持不俗，只系未见再有资金入场，要再大升重上二万唔系无可能，咪靠每日裂口跳升，但呢啲裂口虚长升势，见裂口走去追货，要有心理准备要再坐一会。总之长假期前，买货要三思，尤其喺19000水平之上买货，值博率已大减，唔想承担长假期风险，宁愿失走机会，静待更佳入场位置，宁买贵，莫买错，呢两日提早收炉，准备过圣诞节。