世界杯2022｜专家分析:摩洛哥季军战「大」波「格」
2022-12-17 08:45 
继分组赛后，克罗地亚同摩洛哥将会喺今晚嘅季军战中再度碰头。两队今届表现令人眼前一亮，尤其摩洛哥系历届踢到最佳成绩嘅非洲球队，相信呢场会几精采。
克罗地亚上场开坏咗个头，到下半场初段不断换入球员加强攻力。不过，「格仔兵」五十分钟换入比较高大嘅般奴柏高域，同卡拉马历打「双塔」战术，但之后嗰啲无乜边路嘅传中波，完全发挥唔到两位球员嘅制空能力。输到第三球之后，克罗地亚有几次死球攻势，后衞洛夫云嘅入楔有好大威胁。艾尔讲过阿根廷嘅制空力较弱，领队达历虽然喺半场时已经揿掣，但打法上似乎未有针对对方嘅弱点，变相「只系攻，得个空」。
摩洛哥上场对衞冕冠军嘅法国表现绝对唔错，唔系死守到底，下半场射门达九次，比法国多超过一倍。奈何前綫入波「只差一点点」，后防球员连续两次集体被基利安麦巴比「玩弄」，最后只能睇住法国庆祝入决赛。事实上，中场苏夫恩岩拉伯特嘅出色表现，更获得法国总统马克龙大赞。「亚特拉斯雄狮」拚死一战嘅精神，已经令在场多位粉丝动容，季军战相信会更加落力。
睇返自二战后举办嘅十八届世界杯季军战，只有四届总入球少过三球，包括上届比利时两球净胜英格兰。虽然克罗地亚同摩洛哥今届首次对碰闷和零比零，但季军战相信无咩保留。
摩洛哥上场好早阶段换走安尼斯利、保法尔等进攻主力，克罗地亚大部分球员亦无乜出过力，两队今场可能上演入球骚，全场入球大细「2.5」大可以考虑，另可博安尼斯利「入球」嘅首发事项。 -艾尔
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
關鍵字
最新回应