世界杯2022｜专家分析:摩洛哥续谱童话故事？
2022-12-14 10:30 
四强另一焦点大战，法国对摩洛哥。本报多位名家先后提过，现代足球变化非常快，各队战术组织、球员体能、防守部署等逐步成熟，牌面较弱嘅球队逐渐拉近同强队嘅距离。诚然，摩洛哥球员质素唔及法国，但仔细再睇，薛耶治、阿舒拉夫、安尼斯利、路曼沙斯、耶辛尼保奴等都喺欧洲五大联赛搵食，其实都唔系极差。佢哋适应晒讲求高位逼抢同体力化嘅足球模式，系摩洛哥防守嘅最强武器。
摩洛哥的防守非常严密，就连今届首位上演帽子戏法嘅干卡路拉莫斯，上仗面对摩洛哥守衞都无乜优势。同埋，摩洛哥上仗两闸都有轮换，防守都系咁劲，除咗有赖半个主场嘅震慑力，领队列格古可以团结呢队极具个人风格嘅球队，更加值得鼓掌。还有，摩洛哥唔系踢紧「九零一」足球，防守反击效率都唔能够睇小。虽然球队目前场均预期入球只有零点八，但全队纪律同配合程度好高，每次都可以制造到具威胁嘅埋门。
法国打破到「衞冕魔咒」，杀到入嚟四强，的确唔简单。今届「高卢雄鸡」把握力极强，唔止基利安麦巴比、基奥特头顶脚踢样样有，就连曹亚文尼上仗都有「神来之笔」，攻力之强毋庸置疑。不过法国今届五场赛事，场场都有失波，包括对澳洲先失一球。艾尔讲过法国两闸的防守一般，中坚乌柏美卡奴又不时犯错，后防唔太稳阵，今场对反击唔错嘅摩洛哥有一定考验。
论质素，法国赢。论整体，艾尔觉得摩洛哥赢。既然系咁，当然要支持下摩洛哥喇，希望「亚特拉斯雄狮」能够杀入决赛，继续谱写呢段童话故事！ —艾尔
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
關鍵字
最新回应