世界杯2022｜专家分析:红魔狂牛令人失望
2022-12-08 09:25 
寻日喺本栏同大家倾完笔者心目中发挥正面嘅球队，今日就讲下部分令人失望嘅球队。
首先笔者嘅不二之选就一定系比利时，佢哋喺外围赛以不败姿态杀入决赛周，最后喺分组赛出局，阵容上嘅选择或者早已埋下端倪。夏萨特毫无状态，但一直占据正选；继续重用远离主流联赛嘅维顿汉同艾达韦列特；巴舒亚伊全场隐形显得奇云迪布尼独力难支等等。以上种种，当中最大责任当然系已离任嘅领队马天尼斯。球队内部问题亦未能好好处理，令球员喺球场上嘅貌合神离显而易见。
另一队就系啱啱十六强互射十二码出局，高开低走嘅西班牙。首场横扫哥斯达黎加后，笔者一度以为佢哋今届会一帆风顺，岂料最后一场对日本嘅分组赛在超过八成控球率之下被击败。而当中为人诟病是空有控球率。这问题喺对摩洛哥的一场中再次浮现，三人中场继续猜唔到个波去龙门，印象中全场最对办嘅射门要去到补时最后一刻沙拉比亚嘅中楣波。至于可能有朋友问点解无德国份？老实讲我觉得佢哋今届踢得唔算好差，只系有少少欠运，加上同西班牙喺对哥斯达黎加嘅次序亦影响咗佢哋出局嘅结果。 —球乐
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
關鍵字
最新回应