洪嘉豪11月举办首个唱 路上发生意外认悲观要改
2022-10-05 09:00 
洪嘉豪将于11月12日及13日举办第一个个人演唱会 ，两场演唱会加埋等同开两场红馆三面台，而现时内部认购亦已爆满。除咗讲到今次演唱会嘅特别构思，嘉豪仲话会有新惊喜畀大家！
【点击睇海报相花絮】：
象徵演艺生涯的缩影
早前嘉豪为演唱会影海报相，海报特别将四季置于身上，服装七彩缤纷之馀，脸上又有一滴银色泪，象徵他演艺路上一路走来的缩影。嘉豪表示：「好多嘢都系由一个循环组成，人生、爱情，我新歌《还原泪》都系讲紧一个循环。今次想成个主题都围绕开心欢乐，所以你见我身上都系七彩缤纷。但又有春夏秋冬循环缩影。」
希望亲友、fans见证
提及今次个唱嘅规模其实等同两场红馆咁多人，嘉豪就好惊讶，仲话：「第一次听到脚都震。（内部认购已经爆晒喇！）我都系而家先知！惨啦咁就，我仲有好多兄弟、朋友、屋企人未落飞……我仲狮子开大口答应咗佢哋，今次一定买到飞，我点算啦.....而家点算？」嘉豪仲话，自己一直希望开户外演唱会，而今次仲有屋企人、朋友，同埋一班fans见证：「希望佢哋全部都可以在场，同我一齐见证呢个大日子，佢哋无论我高高低低都喺我身边，对我嚟讲，系好重要的人！」
预告会有新惊喜
嘉豪表示上次同MC合作嘅「FRENEMY Live 2022」演唱会已经开始操肌，仲话会一路keep住。至于会唔会除衫，嘉豪就话：「11月都凉啦……到时入场睇罗！」而跳舞就「一定会跳得好过上次！」除此之外，嘉豪仲预告埋会有新惊喜！嘉豪嚟影楼前原来发生咗个意外：「我住得远系人都知，要11点到达开工，我好早起身准备啦！好准时过紧海，谂住仲有七分钟，一定早到，点知就喺呢一刻，喺隧道入面，听到架车「噗、噗、噗」声。我当时喺中间线停唔到车，心谂唔系爆胎呀？捱到出隧道口，停埋一边一望『爆晒！』好彩有个职员哥哥嚟救我，问我使唔使帮手，仲开条私家路我行，我入私家路之后，一、两分钟转出嚟就已经系汽车维修店！虽然迟到少少，但系都安全到步。」
在场同事即刻反问：「你唔系倒霉喎，你系好好彩！你爆咗有人帮，仲开条光明大道你行，你行运啦你！点会系倒霉？」嘉豪傻笑答：「系喎，我真系要改吓自己悲观性格！」、「唔驶叫拖车！」
【其他文章】：
「五虎」最靓星二代逐个睇！三哥囡囡影半裸写真超狂野 汤镇业两女都系Model级
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应