古天后日志｜港股趁北水假期反弹 暂难摆脱提款命运

9月29日，大致多云，有骤雨及几阵狂风雷暴。隔晚美股反弹，多得英伦银行紧急买债嘅消息，令市场憧憬央行开始救市，刺激欧美股市反弓，道指跟标指升逾1%，纳指更升超过2%。美汇指数仍然高企，英镑跌到唔识停，兑美元一度下试1.06水平，为稳定英镑汇价，英伦银竹宣布喺未来两星期人月会紧急「无限买入长债」，系全球第一间央行喺缩表期同时，又买入长债嘅地方。市场视英伦银行呢个为救市举措，美国10年期债息由4%水平，急急回落至3.74%，美股乘机反弹。虽然英伦突然买债，目的系稳住英镑汇价，但缩表计划持续，明年减持8380亿英镑嘅缩表计划未有变，环球资金收水嘅大方向持续。

尤其美汇指数高见114水平，美国收水下环球资金回流系大势所趋，资金流走，人民币跌至7.26，正式跌破7.2关口，走势较预期快。人仔下跌令人民币资产吸引力下降，A股虽然有传闻指中证监指引喺二十大前唔好沽货，A股星期二因为呢个禁售传闻劲弹，不过周三已打回原形，主要系市场未见有新资金流入，A股反弹亦只有昙花一现。

至于港股喺噚日跌至17185低位，淡友压低转仓姿态明显不过，不过正正因为压至低位转仓，唔排除结算后，10月初段有反弹。加上呢两日见成交有所回升至逾千亿元，再唔系之前阴乾模式。隔晚夜期跟ADR反弹至17600水平，其实只系回补噚日日间嘅跌幅。其实港股跌至18000水平之下，唔少股份已跌至合理甚至吸引水平，问题系喺无新资金流入下，港股反弹力度亦有限，唔排除呢几日北水休市弹高些少，北水返嚟见啲价靓仔咗，又出手减货，港股都只不过系中外资金嘅套现提款机。