古天后日志｜港股未有见底讯号宜忍手

9月28日，大致多云，有几阵骤雨，日间短暂时间有阳光。美股隔晚早段反弹，可惜道指早段升近400点后，又有联储局官员出嚟放鹰，美股转升为跌，道指收市再跌125点；标指跌7点，纳指则见后抽，微升26点，但11000点反弹阻力未能收复。暂时标指跟纳指喺支持位争持，道指则再穿底，虽然美股已出现超卖，反弹亦系正常，但都敌不住沉重沽压，两日都系弹散格局，人人都等弹高沽。10年债息逼近4%，高见3.99%，幸而今次科技股沽压有所收敛，部份龙头重磅股死守，但唔排除系托住出货，若然连呢批龙头股都失守，美股或迎来终极一跌。10年债息升至接近4%水平，债市吸引力已高过股市，高盛跟Black Rock建议减持发达市场股票，因为呢啲股市嘅估值相对唔平。

噚日有外媒路透社爆料，指中证监发出指导，表示喺二十大前要保持股市稳定，唔准基金沽货，呢个消息引发资金入场，A股噚日三大指数均见上升，不过深沪两市成交只有6662亿元，即系无新资金流入，只系塘水滚塘鱼，无乜睇头。

港股疲弱未改，没有最差，只有更差，连日跟随美股向下，虽然午后一度跟随日A股向上，恒指收复失地但仅升5点，叫做守住17800水平，但成交额只有975亿元，完全无任何见底讯号，摆明港股已成为弃婴。金管局再接港元沽盘，夜期随美股插水，ADR跟夜期均插水至17600水平，睇嚟今日又系仆直。

腾讯(00700)为对抗南非大股东，日日都拎3亿出嚟回购，可惜仍不敌大股东沽货嘅力量。不过腾讯跌穿300元后，大股东减持速度有所收敛，可惜腾讯未见有力量反弹，睇怕系市场担心南非大股东一日沽盘未完，喺心理阴影下，点会有人想出手接货，至怕系其他基金踩多脚，沽埋一份，咁真系唔得佢死。至于分段买货嘅问题，喺美股未见终极一插，港股未出见底讯号前，都系继续忍忍手。