陈可辛入行38年揭巨星合作秘史 金城武最难沟通志伟未瞓醒演技最好
2022-09-28 08:00 
ViuTV节目《导演‧门》每集请嚟资深导演接受访问，大讲做导演以嚟嘅趣事，爆吓电影内幕，之前陈嘉上就唔觉意爆咗22年前，谢霆锋陪女友王菲到日本拍《恋战冲绳》，当年两人未公开恋情㗎。最新一集请嚟夺奖无数的导演陈可辛及凭《一念无明》获得第53届金马奖最佳新导演、第23届香港电影评论学会大奖最佳导演及第36届香港电影金像奖新晋导演的黄进担任嘉宾，大谈跟曾志伟、金城武及黎明等巨星合作的趣事，估唔到金城武最难沟通，更估唔到黎明份人原来最易话为，仲拆解观众对票房嘅误解。
TEXT:星岛头条娱乐组
59岁的陈可辛拍过多套经典电影如《金枝玉叶》、《甜蜜蜜》及《十月围城》等，主持陈咏燊及客席主持Rubberband主音6号赞陈导演拍过好多类型电影，陈导演笑言，「系咩类型都有，但唔关我事，唔系想挑战自己，系为势所迫，一定要拍唔同类型嘅电影，先可以吸引观众入场，所以我反对啲人话我系高票房导演，我嘅票房一啲都唔高，所以先不停喺度转，令我能继续拍电影。」
赞叹黄进16日拍起《一念无明》
问到陈导演最欣赏黄进边方面?他说:「近十年，最锺意新导演拍嘅电影，的确系《一念无明》，我睇到成熟度，我明好多导演第一次拍戏想炫耀一啲技法，佢好识一样嘢，less is more，用咗16日，就拍咗一部咁细致嘅电影。」陈导演又拆解观众对票房的误解，「拍香港电影要赚钱系好不切实际，系无可能嘅事，观众成日以为有4000万票房，4000万系戏院嘅收益，片主只能拎返40%收益，4000万票房，只能拎返1600万，但1600万收益，仲要扣除500万宣传费，咁就剩返1100万。」黄进无奈表示远比观众想像嘅困难，陈导亦认同，「所以要支持香港电影。」另外，陈导又好锺意黄进讲嘅一句说话，「电影应该要所有观众都睇得明，我好怕有啲导演会话，『你唔锺意睇呀，我唔系拍畀你睇。』我觉得呢句嘢好不负责任。」
够胆叫志伟演戏要收敛吓
两位导演都曾跟曾志伟合作，黄进就好感激佢，因为佢搵曾生先再搵余文乐拍《一念无明》，「曾生肯做已经好大帮助，我好想做一个配搭，用主流演员，拍一啲非主流嘅题材，曾生睇咗剧本锺意，然后肯做，其实已经将呢个配搭完成咗一半，佢唔肯做，我未必有信心说服余文乐演出，因为我本身完全唔识佢。」
另外，陈可辛对于曾志伟演技有好另类的睇法，「啲人话点解拍志伟两次都可以攞奖，我嘅方法就系叫佢收敛一吓，其实佢演技好好，不过佢太喜欢演戏，亦太认真去演，有时声量会太大，啲声会拆，因为我同佢够熟，够熟可以直接开口，好多人好怕佢，因为佢真系大哥，好多人唔敢讲出嚟。」佢又透露近日因为君如获选焦点影人，所以重温佢以往的电影，其中一部就是《金鸡》，「志伟喺嗰部做得好好，佢纯粹做一个喺柜员机打劫阿金嘅人，佢只系嚟咗一晚，当客串，咁佢好冇压力，好放松，一嚟到就瞓，睇返佢真系做得好松，因为要踢佢先叫得醒佢，然后朦朦胧胧咁讲对白，结果演得好好。如果畀晒剧本，好认真去演，可能会演过头。」
黄进听完陈可辛嘅见解亦认同，更笑言，「当时佢好忙，周围飞，佢一落机就即刻拍，嗰啲时间佢系做得最好。」陈导笑住和应，「唔知道就最好，唔好知咁多。」黄进再补充，「佢有一个好强嘅导演脑袋，佢分咗一半出嚟，去睇你攞咩SHOT，几时剪啦，然后佢唔想你剪，会做啲嘢等你剪唔到，但佢好清晰嘅，知你要呢样嘢一定演畀你，佢好喺导演立场去谂。」
金城武有100个理由推戏
陈可辛入行38年，同过无数巨星合作，而每次都有好成绩，问到有咩方法同巨星沟通，陈导答得轻松，「无咩窍门，最重要同演员互相信任，当然好多时达唔到呢样嘢，唯有搵办法，睇吓边一个让步，或者改剧本就个演员，如果个演员好硬净，硬碰硬嘅话，其实自作自受。」再问边位演员用最多时间建立关系先可以沟通?陈导想了一会就答，绝对是跟他三度合作，分别是2005年的《如果·爱》、2007年《投名状》以及2011年《武侠》的金城武「佢系一个唔太想演戏嘅人，作为朋友问过佢，『你做咩唔拍呀，又推?』每次搵佢都起码求半年，佢真系会搵100个理由去推，我唔啱做，我唔可以去无电脑网络嘅地方拍戏，呢啲又唔得，佢梗有一个理由。」陈导又爆金城武鲜为人知的真实性格，「佢系一个好主观嘅人，又系一个比较自觉嘅人，所以好难令佢觉得好自然，好舒服咁喺镜头面前，佢一定要搵到一个安全距离，先愿意去做。」
提到2007年的《投名状》，有李连杰有刘德华又有金城武，究竟点样去平衡演员之间的合作?陈导坦言三位一线男演员好难走埋一齐，同性多个一个一定有竞争，「避免一齐讨论，记得有一次系避唔到，就拗起上嚟，嗰场戏有啲嘢未解决，当时有啲慌张，拗起上嚟，只能同最相熟嗰个金城武讲，『喂，你唔好加把口啦』。」
黎明由歌手变演员的经过
再问同边位演员最一拍即合?陈导谂都无谂即答，「同黎明都算一拍即合，佢同金城武完全相反，佢冇乜问好多问题，佢第一套戏就系《甜蜜蜜》，一嚟到，我就同佢讲想拍一部咁嘅戏，佢话好，表示有兴趣，嗰时啱啱完成演唱会，去咗佢屋企倾咗成晚，佢话好锺意《双城故事》，然后就讲完，我就问佢细个嘅嘢，感情关系，佢比我嘅感觉好单纯，佢有黎小军(《甜蜜蜜》角色)感觉，好一拍即合，拍嘅时候，近乎我话点就点。」
陈导更提到当年如何令黎明由偶像歌手脱胎换骨变演员，「我同奚仲文去说服佢，你一定要剪头发，佢问要剪几短，我话好短，一定要剪到你唔似黎明，佢话咁样有啲难度，因为始终佢系一个偶像，一个歌手，唔可以几个月变另一个人，当然剪短咗就会变得老土，咁佢叫我哋去佢屋企，再搵埋发型师，大家一齐剪，攞个共识，我哋唔离谱，剪得嚟都留有馀地，攞到共识之后合作就无问题。」而黎明亦于1997年凭《甜蜜蜜》首获影帝提名，2002年就以跟陈可辛再度合作的《三更之回家》打低5度提名的张国荣，获得第39届金马奖最佳男主角。
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应