独家丨葛民辉拍住凌文龙片场栋笃笑自爆性格文静锺意听浪声

2022-09-14 07:00

葛民辉近期同MC（张天赋）及凌文龙(小龙)拍摄新片《夜校》，《星岛头条》突击探班，好耐无拍戏的阿葛全程表现风骚，孖住小龙同陈紫萱（Summer）受访时好似表演栋笃笑一样，拎住只道具胶手系咁揈，仲兴奋到讲埋谐音粗口，搞到小龙笑唔停。

斋睇阿葛呢个样，已经觉得好搞笑。

阿葛形容今次《夜校》中角色「人唔以人，鬼唔似鬼」，问到佢同角色有冇相似地方时，佢话同角色一样咁文静，「我本身都锺意喺石澳海滩听吓浪声，同埋平时都会同刘德华一齐练吓书法咁，吟诗作对拉二胡。」

阿葛同小龙及MC，在电影《夜校》中初次合作。

戏中 Summer因为唔锺意男友小龙成日黐住MC，觉得两个废青好唔长进而大闹佢哋，Summer话好想做金丝雀俾人照顾，阿葛即发表伟论，「佢𠵱家系手撕鸡，暂时入咗戏，原先个金丝雀仲喺个元神嗰度未抽离到，佢哋两个（Summer同小龙）主要无啦啦多咗个人（MC），令佢觉得小龙唔长进，拉埋个MC 嚟搞我呢单嘢，更加嬲，我好明，因为我全程喺度偷听嘛！我喺度做CCTV，咩都畀我看透晒，啲底衫底裤咩颜色我都知，我唔讲啫！」

阿葛拍住小龙做访问时，一唱一和相当合拍。

小龙声称戏中系个天才科学家，记者一睇就知佢系「自己觉得」，阿葛又再发功，「你好似洞悉到啲嘢，女仔啲眼系有X光，好似啲阿妈见你放学返嚟，你系咪做咗啲坏嘢，吓！点知嘅阿妈你，我咩都未讲喎！」

阿葛孖住小龙同陈紫萱（Summer）受访时，好似表演栋笃笑一样。

讲到小龙同Summer戏中的动作场面，阿葛就亲自解话：「放心佢哋唔会有家暴，我睇得出佢哋两个系喜欢，佢哋系有啲SM feel，你睇呢度(拍摄现场)都知，有电钻啦，有工人衫，有咩两夫妇间屋会咁，平时应该系吊高嚟，你见到个牛头马面，你就知平时吊住喺嗰度啦！哈哈！鞭我啦！无啦啦点会放喺张牀嗰度，风水咩？！大家唔好试，头先我试过唔稳，呢度啲嘢都唔好掂，嗱喳，黐黐立立咁。」

阿葛话今次角色好文静，真系郁都唔郁。

就「动作场面」阿葛仲未讲完，栋笃笑继续，「（电影）出街嗰90分钟系冇嘅，平时我哋试戏啲闺房戏拍晒，如果唔系点会无啦啦有幕有雪柜，我无啦啦要入雪柜，佢哋玩到入雪柜玩，连我都要玩埋，点解呢？导演你拍紧咩呢？呢度地方细，隔离屋会听到，放我入雪柜搵我嚟试隔音，真系冇奶油（理由）！」
TEXT:星岛头条娱乐组