古天后日志｜指数龙头排住队被减持

9月9日，天晴，天气乾燥，日间天气酷热。隔晚美股低开后尾市有后反弹，虽然欧央行宣布加息0.75%，拖累欧洲股市下跌，美股早段低开，不过上月美股经过一轮挟淡仓后，淡仓已减少，令9月跌势不及5月强劲，超卖后出现反弹亦好正常。业绩期结束后，美股暂时无乜方向，市场等待CPI公布，仲有FOMC议息，以及下周四重期结算嘅四巫日，预期喺议息前，美股表现继续反覆。

喺燃气价格高企下，欧洲今年CPI预测由6.8%调高至8.1%，明年预测则由3.5%调高至5.5%，为抑止通胀，欧央行决定加息0.75%，并预期未来息口将进一步上升，市场认为欧央行下月再加息0.75%嘅机率已增至四成。不过欧央行继续保留紧急抗疫购债计划(PEPP)嘅QE方案至2024年底，当然系为咗一旦经济衰退，以及债息急升时作为应对之用。

鲍爷已暗示为对抗通胀将继续大大力加息，但市场反应唔算大，纳指连跌七日后有资金低位吸纳，加上今次美股跌浪期间，未见VIX有升过30水平，跌市期间多都系由19升至27，市场嘅恐慌程度，远远不及5月份。美汇指数升至110左右已无力再推上，市场再次risk on，亚洲货币嘅跌势有所缓和，睇睇今日个市有冇得借势弹一弹。

不过港股就算反弹，力度都唔会好大，可能19200至19300左右又行人止步，几只龙头股都有大股东准备沽货，个个都想套现自救，Naspers需要大量现金进行回购以支持自身股价，又将大大嚿货转仓去CCASS等沽货套现，腾讯(00700)就有消息指有意减持手上投资套现千亿，美团(03690)跟快手(01024)等又成为沽货目标，仲有日本仔要沽阿里(09988)，几只恒指重磅股都要排住队畀人沽，港股呢期都只会系有波幅，冇升幅，可能就系19000水平，上下几百点上落。