独家丨马国明慈父上身：猫女黐妈咪多啲 新手猫奴甜讲猫经预习做父母

马国明在剧集《白色强人II》再演「唐明」，跟郭晋安及陈豪合作，最开心到内地拍摄时经常聚会，听到两位爸爸分享凑仔经，虽然马明未有正式计划同汤洛雯结婚，但两人早前开始同居兼养了一对猫，令马明有机会预习做「爸爸」，日日享受做「猫奴」凑猫。马明提起一对宝贝猫，全程温柔声加冧爆眼神，30分钟访问讲足20分钟猫经，连讲7次「仔女」好得意，更心心眼表示「猫女通常黐『妈咪』（靓汤）多啲。」好Sweet呀！采访：杜杜 摄影：谭志光　场地：荷里活广场莆田

马明和靓汤年前在将军澳租屋同居，未结婚先预习做「父母」。

马明话今次拍《白色强人II》特别开心，因跟拍档到内地住埋同一间酒店互相照应，感情特别好，「阿Mo（陈豪）直情冲咖啡送去我哋房，好似一班学生去宿营，收工就搵地方食饭，愈倾愈讲得多私人嘢，大家会更加熟更加Friend，感觉好开心。」

马明跟《白色强人II》一班演员合作开心，更获安仔和阿Mo分享心得。

学定做老公老窦

已组织家庭的安仔和阿Mo更狂向马明分享经验，虽然未有加快他结婚步履，但真系学到嘢，「我锺意听呀！譬如佢哋搵屋拣边区，使唔使就小朋友啲学校网？虽然我𠵱家未系爹哋，佢哋连搞结婚同夫妻相处之道都有讲，好多嘢已经袋咗落袋，哈哈！」马明同靓汤以结婚为大前题交往，年前更在将军澳租屋同居，但强调同居目的只为防疫，「之前我同佢都拍剧拍得好密，间屋其实系隔离屋，我哋拍剧又唔可以戴口罩，中咗又唔知，好惊返屋企会感染到爹哋妈咪。」早前马明曾中招，幸好已搬出来住冇传染家人。

早前靓汤突然放闪，由于甜度太高，又被大家催婚。

绝密马明爹哋视角

马明对「子女」事特别上心，访问后即搵靓相传给记者，但最搞笑串错囡囡名，第二朝先醒起，而回覆短讯时已全用各式猫猫图像。

马明承认手机Save大量「子女」写真相，这张见到Ariel（左）和Valentino几相亲相爱。

记者赞Ariel靓女，马明搞笑用「记低佢先」图像回覆。

马明承认手机Save大量「子女」写真相，这张见到Ariel（左）和Valentino几相亲相爱。

好似凑小朋友咁

同居生活令马明最开心，其中一样肯定是跟靓汤预习做「父母」，他们养了一对布偶猫Valentino和Ariel，囝囝名由马明改，囡囡名就由靓汤改。两人由猫B喂奶期亲手凑到现在约一岁大，所以一提到「仔女」，马明就劲兴奋，秒速慈父上身，「今朝佢哋四点几五点就嘈醒我，冇嘢食肚饿罗！我哋睇过一啲猫节目讲，猫晨早或者黄昏最活跃，人凑小朋友十二点食完奶三、四点又再食，𠵱家好似有少少凑小朋友嘅感觉。」呢位新任「猫奴」狂赞「仔女」，「佢哋好似只狗仔咁㗎！识畀手同坐低，早排我只猫女有只眼发炎，我一话滴药水，佢就走咗去，好似识听广东话，匿埋搵唔到佢，好似小朋友。」

今年5月靓汤生日，带埋「仔女」去staycation，马明都有同行。

马明赞靓汤是「好妈咪」，教得「仔女」又乖又叻。

每日返工要交待

马明已完全被「仔女」融化，仲会自称「爸爸」，「都会话过嚟爹哋度，对住啲猫系会好冧，佢哋好嗲，我都几享受，去边都黐住，喺我脚边徘徊，搵条尾扫吓，搵个头捽吓，又反肚，系好得意！」就连去开工都要跟「仔女」交代，虽然冇晒自由，但马明觉得好幸福，「我每日开工都要同佢哋讲，佢哋见我换衫，就跑晒去门，顶住唔畀我出去，我要同佢哋讲好快返，推开佢哋先捐到出去。」虽然Ariel似画了眼线超靓，但马明强调「仔女」一样锡绝无偏心，更自爆，「女通常黐『妈咪』（靓汤）多啲，只仔就黐我多啲，系好得意㗎！」虽然他已担心有日「仔女」离开时会好伤心，但他跟靓汤未打算要他们开枝散叶，「有研究过好唔好畀佢哋生，但系一生四、五只，畀边只人！？我拣唔落手，五只都系佢哋嘅仔女，咁唔好烦唔好生，暂时两只够嘞！」

马明扮埋「仔女」顶住道门唔畀返工，劲搞笑！

近日靓汤到澳洲工作，马明首次独力照顾猫猫，「妈咪」每次通电话第一时间是关心「仔女」情况。

马明坦言入行以来宁攞奖金不要奖品，所以不期望再凭「唐明」一角攞视帝。

立即下载 | 全新《星岛头条》APP https://bit.ly/3yLrgYZ