独家丨黄夏蕙亲揭整容之谜直击离港前24小时狂扫假发鸡眼膏

2022-08-19 06:58

上周四(11日)早上黄夏蕙带著离愁别绪同老公潘炳烈出发到美国生活，《头条娱乐》记者直击她离港前24小时嘅动态，再次强调「只系」89岁的夏蕙BB由好友方俊(张伟文经理人) 陪伴，连踩几个地方狂扫化妆品、药物及假发！她还揭开多年来整容失败之谜，强调自己鼻高、眼冇问题，反问：「做乜要整？」暗示自己从来冇整容。另外BB强调唔使隔离后会返港，因为要处理已故老公家族过亿遗产。采访：方骞平摄影：谭志光

「变发」后黄夏蕙变得好Hip Hop，劲好笑。

当日正值下雨，好彩有张伟文嘅经理人方俊拖到实，照顾周到。

黄夏蕙上周四随老公潘炳烈离港。

BB强调唔使隔离后会返港，因为要处理已故老公家族过亿遗产。

离港前一天的黄夏蕙忙到癫，除咗一早要去做核酸检测，又要去银行，午饭后连踩两间药房扫止痛及止屙药、鸡眼膏、胃药，再转战假发店，买咗5个长、短发作替换，最后用埋消费券尾数购买眼睫毛液、睫毛胶水、胭脂、粉底、眉笔等，好彩获照顾开老人家的方俊陪伴，接载她出入，节省唔少时间。

夏蕙BB话脚底生鸡眼好痛，要买大量鸡眼膏去美国备用。

BB用埋消费券嘅几百蚊尾数狂买化妆品。

照顾开老人家张伟文的方俊陪伴夏蕙BB周围去。

已故老公赞佢引死人

夏蕙BB试戴假发时显得相当兴奋，仲拣咗啲狂野爆炸头作登台用：「疫情下封关，有3年冇返内地买假发，用开嘅都残晒！喺美国买会好贵，所以统统都会带走。」贪靓嘅BB认为全世界女人都爱靓：「𠵱家啲皮皱晒，唔想变老婆婆，最想打抗皱美白针。」对于多年来一直被指整容失败，BB一口否定：「以前冇呢啲嘢，我个鼻咁高仲整乜鬼呀！少年冇丑妇，𠵱家我五官同后生时咪一样，人哋噏咪由人哋罗。」夏蕙BB仲自爆，跟已故老公胡百全初相识时，对方用「放路溪钱」形容她，喻意引死人，因为以前要撒溪钱引领棺木前进，BB讲返呢段故依然冧到爆：「我都系第一次听呢句话，心谂『咁巴闭引死人？』嗰时系读书女，天真无邪连胭脂都唔会搽。」

BB强调黑色发尾全部系真发，而且冇白头发。

BB同方俊试狂野假发，好搞笑。

BB强调从来冇整容，𠵱家眼耳口鼻同以前一样喎。

BB好贪靓，就算要戴口罩，食完葡国鸡饭都要即刻补搽唇膏。

绝对冇跟林蛟拍过拖

黄夏蕙满足地再爆陈年情史：「以前追我嘅人多到数唔晒，我好锺意爱情，但只系对老公专一，对追求者会落闸，生命中只得两个男人。」记者指她数漏初恋情人林蛟。BB强调因为旅行时对方要求合照，张合照就惹嚟误会，并风趣地解释：「后期我哋一齐拍戏啫，当时我有车咪车埋佢变咗『同车』罗，当年我好忙，冇机会一齐，而且佢一直有老婆，我唔觉得佢靓仔，唔锺意戏行啲人咁随便，锺意胡百全斯文淡定、靓仔、官仔骨骨、有学问。」至于潘炳烈除咗型，仲系斗车天才，锺意佢够Man：「锺意一个人，喺佢面前扮猫做狗乜都得啦，否则做老虎都冇用，如果同佢唔甜蜜唔会跟佢去美国。」不过，两个比较下，BB坦言最爱一见锺情嘅胡百全，尤其他放下公职，不爱江山爱美人。

就系呢张旅行相，林蛟要求同BB合照搞到惹上绯闻。

当年胡百全带黄夏蕙一齐去拉头马。(

9年前BB陪同潘炳烈出战《莲花大中华杯赛》，BB形容当年老公77岁仲型到爆。

夏蕙BB还说：「个天『文武状元』都畀晒我，令我呢生冇憾，所以做人好开心冇压力，更加要锡多啲老人家同年青人。」方俊挨实话唔舍得BB，尤其欣赏她敢言及正义感，肯为年青人发声。BB力撑MIRROR：「意外嘅嘢冇人想，希望公司作出补救后，佢哋又梳理好情绪就重新开始，我都锺意佢哋㗎。」最后BB承诺唔使隔离后会返港，因为她要返港处理胡家留畀佢及子女以亿计算嘅遗产，打算用嚟做慈善。