独家丨黎诺懿连环泄密先爆蒙嘉慧日本读紧书再爆伊健留港玩水唔陪老婆

2022-08-18 06:58

黎诺懿于疫境下事业有大突破，除变身「疫境厨神」主持饮食节目《满足的味道》外，仲做埋饮食集团创意大使，今年继续推出慈善月饼。黎诺懿除咗忙工作同照顾妻儿，一有时间就会凑埋郑伊健去玩。黎诺懿爆料指阿Yo(蒙嘉慧)喺日本读紧书，短期内唔会返嚟：「伊健可能怕闷，𠵱家喺香港玩水都唔过去。」。采访：方骞平摄影：邓国良场地：Maison Gaia

黎诺懿事业发展得唔错。

郑太蒙嘉慧喺日本，打理房地产生意同时仲读紧书。

郑伊健爱跟朋友与阳光玩游戏。

黎诺懿跟郑伊健识于微时，前者有嘢要帮手，后者一定现身帮忙。

黎诺懿主持6集的TVB饮食节目《满足的味道》，介绍香港美食如烧肉、云吞面、煲仔饭及烧卖等，更会探讨食物背后的故事及情怀等，片头曲更邀得金像级日籍音乐人波多野裕介作曲，虽然节目拍到超晒支，但仍获总经理曾志伟力撑，令他相当有满足感。「疫境厨神」成为黎诺懿的Icon，不过他无意开餐厅：「唔少人搵过我合资，但唔系咁简单，除咗要承担风险，仲要对食客有责任，拍嘢容易分心，而且我对水准咁执著，咁嘅经营模式好快会执笠！都系做住饮食集团创意大使先，今年我会继续推出慈善月饼，将收益捐畀低收入家庭、盲人辅导会等。」

黎诺懿今年会继续推出月饼行善。

黎诺懿近年推出自家品牌月饼做善事，同林柏希一齐送埋货。

《满足的味道》其中一个主题系云吞面。

黎诺懿到屯门烧猪工场，深入地窖介绍长达半世纪历史的大火炉。

黎诺懿成为饮食集团创意大使先，负责设计菜单。

指伊健担屎唔偷食

提到老友蒙嘉慧去年与老公郑伊健移居到日本福冈，郑太更获老公打本7位数于当地开设房地产公司。而每年中秋节，黎诺懿一定约埋郑伊健一家食月饼赏月。今年黎诺懿会额外向造饼师傅，「柯打」一个20黄巨型月饼自用，更预告将会同「一枝公」嘅伊健共渡佳节：「阿Yo今年中秋唔会返嚟，因为佢喺当地读紧两个课程，其中一个系日文。𠵱家伊健喺香港成日同我玩水上活动，我哋学紧啲新嘢，玩冲浪风帆。」

蒙嘉慧身处日本返学兼努力搞生意。

伊健早前拍完台剧《百万人推理》已由台湾返港。

每年黎诺懿都会同郑伊健共渡中秋佳节。

郑伊健今年冇老婆陪过中秋，但仲有老友同父母。

笑他凑住寂寞「人夫」，诺懿即说：「唔好咁讲，佢『凑』住我畀空间我出去偷懒啫！伊健出名稳阵到『担屎都唔偷食』，同佢一齐老婆一定唔担心，反而觉得由佢𥄫返住我。」至于点解伊健唔「返乡下」慰妻呢？黎诺懿就作出分析：「可能佢觉得冇我哋陪佢玩水怕闷，而老婆返港又要隔离咁麻烦就算把啦。其实我都赞成小别胜新婚，咁样反而变返有爱情惊喜。」

郑伊健跟蒙嘉慧近10年婚姻，「保鲜」方法系小别胜新婚。

称高海宁冇新恋情
至于35岁高海宁（高Ling）最近喺社交网晒甜蜜留言，疑似出现新恋情，黎诺懿就叫大家唔好谂太多：「日前先同佢食过饭，以我哋嘅关系，佢有会同我讲，我仲乜同佢隐瞒？佢一直想有个家，佢有我会戥佢开心。」黎诺懿又感恩有个好老婆李洁莹，令42岁的他可以专心工作：「我同老婆好少嘈交，但最近佢发长文忟我教坏个仔(小春鸡)，因为我成日用轻松方式话个仔『老表！好快手啲嗱喎！』搞到个仔咁嘅态度对住老师，老师要见家长反映，我唯有同老婆讲『小朋友慢慢教！』点知老婆忟爆回应『系要教好你呀！个仔学晒你啲嘢。』」