头条戏场丨《雷神奇侠4：爱与雷霆》基斯顿比尔好正呀

就咁嘅，我唔系Marvel迷，因为Taika Waititi再执导同基斯顿比尔有份做先睇，入场门槛超低，完全唔熟都唔会睇唔明，片长119分钟，笑位几多，仲要有啲笑系会翻笑，阴公位又有，配乐及配角最出色，特别一赞嗰两只激嘈又超烦嘅羊，一叫我就笑。(刚上映)撰文:廖思慧

就系呢两只嘢，又嘈又烦，但好搞笑，不过出镜太少。

导演Taika Waititi执导《雷神奇侠3》时，成功「活化」雷神，胶住讲惨事，一套戏就将雷神变成「Fun佬」，Fans赞好更成为指标。《雷神4》上映后，讨论区最多人问，3定4?评价参差，更有人话衰过《奇异博士2》，喂，好侮辱喎。

全部爱都好轻触式
全片最正亦演得最好系首度加盟MCU，饰演大反派屠神者戈尔（Gorr The God Butcher）嘅基斯顿比尔，为角色参考经典惊栗片《不死僵尸︰恐栗交响曲》嘅佢，自爆喺片场因为太入戏，搞到同场演员唔敢埋身！戈尔由深信到质疑信仰再被把剑诅咒，人性秒速扭曲，仲因为死咗个女而向众神报仇，江湖从此多事，最锺意暗影界黑白星球群揪，最后戈尔发现爱系最重要，被爱融化嘅速度快过国产雪条。

特登Cap返句字幕，所有神都要死，讲套戏啫。

因为个女死咗而变质，仲变得好极端，咦，谂起啲嘢添。

宙斯(罗素高尔饰)玩鬼雷神，我剩系挂住望佢身边啲半裸囝囝。

呢幕预告打晒格，睇戏当然冇晒啲格啦。

女武神Valkyrie (泰莎汤逊饰)出镜唔多，但做嘅嘢令人印象深刻。

雷神同女雷神(妮坦莉宝雯饰)感情线如威威谷眼泪，弱咗啲，反而同两件武器嘅爱更好睇，比尔角色刻划可以再Deep啲，最后，锺意Guns N' Roses嘅朋友应该睇到好High。

男嘅挂住女，女嘅都有意思，加埋会呷醋嘅斧头，几好笑。

星岛新闻集团庆回归25周年专题网站，请即浏览

立即下载 | 全新《星岛头条》APP : https://bit.ly/3yLrgYZ