独家丨刘宋威是非缠身:冇良心嘅事唔会做人工激增至七万

2022-06-23 07:00

猪肉切割员刘宋威(阿威)被指似MIRROR的AK(江𤒹生)被追捧，更跳出街市狂拍广告。《头条日报》收到可靠消息，威威家阵收入倍增，除咗3万蚊店长月薪外，每月额外有4万蚊花红，加埋广告收入，月入近6位数。不过，人红是非多，有传后生时行「古惑」嘅威威压力大到爆灯，要做运动减压，问到会否担心再被挖「旧史」？他说：「唔好谂，做好𠵱家嘅嘢，唔开心只会影响表现。」采访：方骞平摄影：沈健程

当日威威冲出荃湾去美孚做运动，沿途有唔少「威威猪」(Fans)为他打气，鼓励佢加油。威威走入商场只系短短十分钟，即被老中青甚至南亚裔学生妹求合照，更对威威说：「好靓仔，梗系认得佢啦。」其中一位师奶开心说：「我专登去荃湾(肉店)兜咗个圈，但见唔到佢呀！竟然喺呢度见到…」另一位Fans就好奇问：「系咪喺呢度开档？」最后连大叔都加入「威威集邮行动」。得到「威威猪」打气，威威心情好返好多，向来热爱运动的他，玩攀石时，只需三扒两拨就爬到上顶。

南亚裔学生都系「威威猪」，威粉真系周围都系呀。

威威好亲民，同「威威猪」玩自拍。

得到「威威猪」力撑，威威合十致谢。

每月多咗几千蚊

有传威威家阵月入7万，他发出鬼马笑声否认：「你(记者)收错风喇！冇咁多，只系多咗『几千蚊』，啲钱留返嚟畀小朋友返小学用，𠵱家收入够自己及家人用。」居于屯门屋邨的他表示未有钱买楼，然后又再笑住爆少少：「其实嗰几万蚊，系银行数字嚟，每月得呢个数字喺银行。」威威话自己好悭家，早上食个面包，午餐带饭，冇时间食就留做晚餐，有时食$20蒸饭，每日最多用60蚊，用多咗冷气钱就要扣减其他开支，仲许下承诺同老婆会共患难及共富贵：「冇良心嘅事我唔会做，有家人嘅支持，我先有勇气行到呢步。」

威威近月接咗保险、波鞋、酱料、保鲜纸及煮食等广告，成为广告商新贵。

威威平日带饭盒返工好悭家。

威威红到去日本，获当地媒体报道。

月初逾百个「威威猪」跟他贺寿，威威感动落泪。

唔戴罩都见得人

对于被踼爆当年做过传销，威威抱正面态度回应，表示当时只系想搵多个钱养家。至于被指旧照唔讨好，他回应说：「我唔会刻意谂人哋点睇我，我就系我，只系做返自己，我又冇呃过人，冇整过容，其实住所及荃湾区街坊，冇乜边个冇见过我除口罩个样，疫情缓和几时都可以除，我个样唔系唔见得人，唔系只卖对眼。」至于有网友指他系黑社会，他开直播喊住否认：「我系基层出身，但点解屋邨长大就系黑社会？有纹身唔系好人？就畀人歧视…」希望大家不要再标签佢。