郑融入行20年唔敢奢望红馆开骚听李克勤周笔畅唱《红绿灯》毛管戙

2022-06-21 10:00

郑融日前作客TVB娱乐新闻台节目《StarTalk》，接受主播许文轩(Edmond)专访，大谈相隔九年再举行演唱会感受。郑融直言开骚感兴奋，她说：「今次有开骚机会系意想不到，如果平时冇做运动嘅习惯，开骚可能会担心体能问题，所以今次好彩，我平时有做开运动，生活习惯好有规律。本身疫情好得闲，可以成日叫外卖，放纵自己，但我话唔可以咁，我要挑战自己食得好清，畀个目标自己，所以影Poster一见到件衫咁少布，都觉得好好彩。」

郑融相隔9年将再举行演唱会。

有前辈翻唱自己嘅歌，郑融觉得好幸运。

郑融入行20周年，自觉时间过得好快。

早前影演唱会海报相。

谈到李克勤和周笔畅于《声生不息》翻唱其代表作《红绿灯》时，她说：「嗰晚半夜同朋友一齐，知道克勤、笔笔喺一个咁大型嘅舞台唱咗《红绿灯》，我自己都好紧张，叫埋朋友一齐陪我睇，我冇谂过到咗副歌部份我好感动，有毛管戙嘅感觉，有前辈翻唱系一件好有成就嘅事，多谢佢哋喜欢首歌，我觉得我好幸运。(呢首歌自己唱过无数次会唔会闷？)好多前辈都话成日唱同一首歌会唱歌呕，我又唔会，呢方面我唔太理解，《红绿灯》呢首歌每次唱仍然好感动。」

明年郑融入行二十周年，她说：「时间真系过得好快，人生第一次有一样嘢系20年。虽然自己产量唔多，但系每次乐迷都好锺意，反应好好，觉得呢20年都好丰富。(明年上红馆？) 自己唔系一个好进取嘅歌手，同埋依家好多嘢都预计唔到，自己唯有尽力俾心机去做好每一件事，其他嘢就交畀个天，迎接机会嘅来临。」