独家丨薛影仪扭拧两日「跪低」继续做「一姐」想自由拣Job唔肯跟亚视续约

2022-06-10 01:30

38岁嘅薛影仪因为去年参选亚姐而爆红，亚视马上将她「私有化」，交由「最索经理人」林宝玉凑住佢搵食。过去一年，阿仪接咗70个Job算系亚视最多工开嘅艺人，月赚过万，但日前阿仪返亚视倾续约情愿放弃底薪，做可以话事嘅兼职艺人！不过扭拧两天，最后都撰择做返「亚视一姐」。采访：方骞平摄影：沈健程

过去一年经理人林宝玉对阿仪照顾周到。

「最索经理人」林宝玉好锡阿仪。

《头条日报》紧贴追访阿仪续约亚视过程，其实早于两周前阿仪多次喺社交平台强调「唔适合娱乐圈」，「就嚟退出」...原来佢真系谂住唔捞全职，选择零底薪转做Part Time艺人，因为阿仪想要自由度可以拣job做，想做先会接，好多人以为阿仪好呆其实佢好有态度。

阿仪果然有「一姐」风范，倾续约好有要求及条件。

原来阿仪唔愁生活。

去年阿仪胆粗粗参加亚姐，竟然一炮而红。

转做PT艺人避欺凌

日前下午，阿仪现身大埔亚视分别会见林宝玉及老板，原来7月约满嘅阿仪被召返公司倾约。《头条日报》直击当日过程，见阿仪喺会议室倾咗近一小时，期间阿仪一改平日零反应作风系咁发言。倾完一轮，阿仪出嚟接受《头条日报》访问时坚决表示：「我要求转做PT艺人觉得会有弹性啲，唔想见到佢哋(欺凌佢嘅网民)。」问到除咗被网民欺凌外，系咪受官司困扰留下阴影呢？她否认，「去年拍嘢系辛苦啲，有时要拍成10几个钟，而且啲人(网民)好八卦，会用我张相整贴纸好烦，又喺IG不停留言(欺凌)…所以唔想再见到佢哋，唔好再叫我『亚视一姐』。」

平日好少出声嘅阿仪，喺会议室同林宝玉倾续约时好多嘢讲。

阿仪曾于社交平台留言表示就快退出娱乐圈。

去年阿仪普通袭击罪成，目前等候排期上诉。

阿仪惹上官非，亚视董事陈伟杰及林宝玉对佢不离不弃。

有财力唔担心生活

对于转做PT可能收入大减，阿仪话唔担心，「总之生活都OK维持得到。」记者追问系咪屋企财力雄厚可以长期照顾埋佢？阿仪突然醒目大耍太极：「唔讲呢啲！」再问系咪因为懒唔想做？阿仪即呀一声被吓窒，之后只补充叫林宝玉有嘢先通知她。在旁的经理人表示尊重阿仪决定，毕竟过去一年阿仪经历好多嘢，一下子未必适应，会畀时间佢再考虑及消化。

过去一年阿仪接咗70个job，有唔少系广告。

去年阿仪同孙慧雪拍过电影《爱.还记得》。

阿仪仲有机会一展歌喉唱吓歌仔。

倾约后两日，林宝玉独家向本报披露阿仪终于回心转意跟亚视续一年艺员合约，跟旧约一样性质不变。她说：「佢续约冇乜特别要求，而我哋会尽量配合佢休息时间及工作类型，其实阿仪仲有幕前嘢想做，例如拍旅游及真人骚，月底阿仪会同一班亚姐去大马做宣传及拍花絮；另一方面公司亦明白佢面对嘅压力，会同佢分析。」至于可会调整薪酬就有待老板决定。林宝玉还大赞过去一年阿仪算系个称职艺人，由完全冇接触呢行，到学会扮靓，又肯听人意见。