MIRROR歌迷会年费440元官方网站开张公布8大着数位

2022-05-10 16:00

上月MIRROR出席所属公司MakerVille记者会，公布成军3年，终于有官方歌迷会！今日MIRROR官方社交平台分享入会详情，同时公布歌迷会官方网站开张，官方仲改咗个名「MIRO」畀入会的镜粉。

MIRROR上月宣布将成立官方歌迷会。

440蚊年费，镜粉都话抵。

一年会籍价值港币440元，一入会就有迎新礼盒，内里包括：会员证、专属会徽襟章、精美立体拼图摆设、一套12张珍藏版明信片及纪念海报。另外7大着数位就包括：订购MIRROR演唱会门票的机会、订购MIRROR粉丝见面会门票的机会、网上订购会员专属商品的机会、网上订购MIRROR商品的机会、MIRO会员专属资源、订阅MIRO会员电邮推广讯息、订阅MIRROR Official Fan Club电邮推广讯息。不过都有啲细字仔戴定头盔话「视乎供应而定」，即系商品同买门票的数量要睇情况而定，而日后部份MIRROR Fans的活动亦将设年龄限制。

MIRROR facebook公布详情。

迎新礼品有呢啲。

仲有Fans Meeting。

唔知有几多门票摆歌迷会卖呢？

MIRO系咪即系镜粉英文名呢？

至于，「揸弗人」鲁庭晖亦有于社交网撰长文写下筹备过程的感受，并表示会一路改进，请大家见谅，他写道：「呢单嘢，系要戴定个头盔先嘅。Mirror official fan club, 同事研究咗好耐好耐。真系好耐。背后嘅所有嘢，太多太多细节，太多太多嘢我哋左谂右谂，太多嘢要平衡，『如果咁咁咁就好』」…好喇，但如果咁咁咁，又会导致另外一啲问题出现。」

他续指：「因为呢个project同搞其他project好唔同，因为系粉丝，因为佢哋系mirror 嘅一部分。呢件事，有血有肉。我几乎肯定，一路做一路会发现有好多超唔完美嘅地方。每个部门同事都好担心。我睇见都戥佢哋辛苦。今日终于launch。我哋会尽力一步一步改善进步，所以头盔位，做得未够好多多见谅。」最后他更大赞welcome pack造得好靓，不少镜粉见状即秒速付款入会，亦有网民误以为加入MIRO便可获得演唱会门票。