独家丨STRAYZ冇公司成员夹5位数出道《造星IV》第3队女团玩自己话事

2022-05-05 07:00

ViuTV真人骚《全民造星IV》为乐坛提供咗三队女团，包括官方女团COLLAR，40强嘅8人女团Lolly Talk，及由阿VAL（赵展彤）及CK（黄斯琪）自发组成的20强组合STRAYZ，5人以独立组合形式行走江湖，自负盈亏。副队长CK坦言冇后台backup，出第一首歌及拍MV，成员要夹5位数出嚟，所以乜都悭住使，条路唔易行。采访：方骞平摄影：沈健程服装：PortsPure

STRAYZ成员队长阿VAL(左起)、Ariel、暐翘、副队长CK、榛綦。

《造星IV》为乐坛提供咗三队女团，包括自发组成的20强组合STRAYZ。

STRAYZ成员榛綦(前左)、副队长CK(前中)、队长阿VAL(前右)、暐翘(后左)及Ariel(后右)一拍即合。

成立STRAYZ全因赵展彤有一日觉得好无聊，「冇乜嘢做，搞个女团玩吓，第一时间撩CK组团。」CK唯一要求就系排舞及走位都要单数，所以5人组合最合适。队长阿VAL表示，组员榛綦（何榛綦）、Ariel（曾家莹）及暐翘（林暐翘）都系心水之选，特别系外型同才华都好好嘅榛綦属首选，队长坦言冇谂过全部都一口答应。

当日阿VAL无聊发起做女团，搵埋老友CK帮手成团。

入唔到COLLAR冇失望
提到当日COLLAR经理人阿Wing有搵CK为COLLAR作歌但最后唔成事， CK表示：「阿Wing知我锺意音乐，搵我帮手做音乐，但去到决赛阶段有自己嘅作品，所以先专注参赛，咁我入唔到COLLAR冇失望嘅，畀时间自己调节吓都好，否则唔会有STRAYZ。」阿VAL直认组合似流浪嘅孤儿，故改名STRAYZ(流浪者)，CK更正说：「又冇咁极端嘅，只系喺我哋当中寻找共通点，发现都系《造星IV》落选20强，而且大家都系唔锺意被困绑嘅自由个体，呢啲个体放埋一齐就变咗组合。」

5人为出道做宣传，希望吸纳到广告增加收入。

阿VAL点头补充：「我哋仲有一个共通点，系冇放弃过追梦，系缘份将我哋Group埋一齐。我会坚持几耐得几耐，一日未死都会继续。」暐翘举手支持：「我好锺意表演想做属于自己嘅音乐，长远目标开到演唱会。」CK指STRAYZ会专注音乐，但未定性系乜嘢组合，除咗唱跳唔排除会试吓搞笑嘢；曾经系家燕妈妈旗下少女组合Honey Bees成员嘅榛綦都想试吓戏剧方面，另外阿VAL亦会单飞发展。

阿VAL曾参加《超级巨声》，所以得到同声同气嘅导师许廷铿力橕。

榛綦好啱做幕前，成为STRAYZ首选成员。

暐翘(左2)喺《造星IV》跟B4组员Sica、东东及Liu哥性感地跳唱。

暐翘否认曾欺凌「肥美人」Lezlie，强调对方只系同校师姐，但从冇接触过。

Ariel做PT搵钱追梦
STRAYZ属独立女团，五人要真金白银拎钱出嚟做歌，暂时夹咗5位数。年纪最细只得17岁，获阿Dee(何启华)力撑嘅「死𡃁妹」Ariel为此要做兼职冲奶茶。CK说：「我哋悭得几多得几多啦！其实真系唔容易，我哋5个人，比独立歌手仲要难5倍，当中遇到嘅困难、不甘、释怀会喺新歌中表达。」另成员亦唔会其他女团比较，觉得一齐为乐坛努力及追梦，百花齐放最好。