独家丨刘雅丽火滚:令爸爸唔可以安息家属不满私吞帛金拒领骨灰爆大镬

2022-04-15 07:00

刘雅丽爸爸刘山本上月17日离世，4月2日设灵，灵堂上刘雅丽和妈妈包晓华特别点名感谢本叔契仔刘德华，指他由本叔患病至去世办理后事都有出手帮忙。不过刘雅丽呢番「感激论」惹来家属极度不满，本叔的大房遗孀女婿方锦培向《头条日报》爆料，指本叔两年逾200多万的医药费及殓葬费皆由他独力负担，更爆刘雅丽母女连去医院见本叔最后一面、领遗体、捧遗照、跟灵车都唔肯。记者就此事联络刘雅丽，她不愿回应家事只强调：「疫情下华仔系有借钱帮妈咪，但讲明卖楼后要还。」采访：娱乐组

刘雅丽认喺灵堂上衰多口，搞到摆咗刘德华上枱。

方锦培(蓝圈)不满刘雅丽母女喺传媒面前做「骚」，但其实冇乜付出。

唔愿出镜及公开访问录音的方锦培表示为良知而发声，绝非要两母女「找数」，他多次重申，「都出咗咁多医药费都唔争在少少殓葬费」，但听到「感激论」令他觉得好唔舒服，力斥两母女：「佢哋喺传媒前做骚，我就喺后台，所有费用由我独力承担，有单有据作证，我睇唔到边个帮手？畀著你条气都顶住喇！四太Eva都支持我一定要公开讲返成件事。」

本叔睇住华仔大，华仔有情有义帮返刘雅丽母女。

3月时，中咗新冠的本叔要喺医院隔离洗肾，每次花费过万，由方锦培支付。

培哥展示本叔殓葬费单据，强调有证有据。

刘父上位钱亦不够

方锦培不满刘雅丽母女，指两人除咗父亲早年入院时，有向朋友借2万蚊做医药费外就冇再负责，至于殓葬费，刘雅丽母亲承诺交出转帐及在场收嘅帛金，但最后只系交低3万5蚊帛金，转帐数更加无从稽考。当方锦培睇报道得知刘雅丽在灵堂上公开感激刘德华帮忙，他即以WhatsApp叫刘雅丽母亲解释。「点解啲帛金冇拎返出嚟?因为本叔连(骨灰龛)上位都未够钱，点知佢就发晒烂渣话『系生活费嚟！』之后仲block咗我。」

刘母曾承诺交出帛金做本叔殓葬费，但方锦培未有全数兑现承诺。

揭刘雅丽非亲生女

方锦培指本叔有4个遗孀，大太太系三书六礼在澳门明媒正娶，刘雅丽母女属第三房，于8年前在拉斯维加斯注册结婚；至于四太Eva于本叔患病期间寄住大房家中方便照顾本叔。由于二太已失联，所以灵堂上只有3个遗孀嘅花圈，刘雅丽母亲的花圈放于当眼位置：「佢咁恶！而我哋都尊重同畀足面佢！」方锦培忆述：「本叔离开当晚，医生畀时间亲人见佢最后一面，四房Eva打畀两母女，对方回应：『人都死咗嚟都冇用，咁远！』作为发妻又唔愿去公众殓房领遗体、出殡时唔肯捧遗照、跟灵车，最爆系四房Eva问佢认唔认领本叔骨灰，刘雅丽母亲竟然回应『你要知道雅丽唔系本叔亲女。』」

刘母回应已被佢封锁嘅培哥，话骨灰由(4太)两个亲女认领。

讯息截图可见四太追问认唔认返本哥骨灰，刘母回应刘雅丽唔系本哥亲女。

刘雅丽现年52岁，但方锦培称刘母只跟咗本叔41年。

本叔灵堂上放置3房家属花圈，刘母花圈放正中间。

当日由大房大女手持本叔遗照，但大房太太没有同本叔注册结婚。

方锦培斥刘雅丽唔肯跟灵车上山。

力斥亲属不知所谓

对于家属指责，刘雅丽称系家事唔想回应，包括系咪亲女，重点系要保护华仔，她带点劳气说：「佢哋以为刘德华畀咗好多好多钱我哋，加上报道指葬礼由华仔一手包办畀晒咁，佢根本唔知咩事，以为我哋私吞咗华仔啲钱，其实华仔系做咗少少帛金，成个疫情华仔真系帮咗我妈咪，加上老窦病，华仔借钱畀我哋，但讲明卖咗层楼就要还。」刘雅丽指妈咪未伤心完好激气才封锁佢(亲戚)，更力斥：「佢讲乜由佢讲，佢伤害紧我同妈咪，令爸爸唔可以安息，不知所谓。」